கொரோனா மீண்டும் அதிகரிப்பு

புதுடெல்லி, ஜூன். 22 – இந்தியாவில் நேற்று முன்தினம் 12 ஆயிரத்து 781 பேருக்கு தொற்று பாதிப்பு ஏற்பட்டது. நேற்று இது அதிரடியாக 10 ஆயிரத்துக்கு கீழே வந்தது. இதன்படி நேற்று 9 ஆயிரத்து 923 பேர் தொற்றால் பாதிக்கப்பட்டிருந்தனர். இந்நிலையில் இன்று புதிதாக 12,249 பேருக்கு கொரோனா பாதிப்பு உறுதி செய்யப்பட்டுள்ளது.
இதுதொடர்பாக மத்திய சுகாதார அமைச்சகம் வெளியிட்டுள்ள தகவலின் அடிப்படையில், இந்தியாவில் கடந்த 24 மணி நேரத்தில் புதிதாக 12 ஆயிரத்து 249 பேருக்கு தொற்று பாதிப்பு உறுதியாகி உள்ளது. இதன்மூலம் மொத்த கொரோனா பாதிப்பு எண்ணிக்கை 4,33,31,645 ஆக அதிகரித்துள்ளது. அதேபோல், தொற்று பாதிப்புகளுக்கு ஒரே நாளில் 13 பேர் உயிரிழந்துள்ளனர். இதன்மூலம் உயிரிழந்தோர் மொத்த எண்ணிக்கை 5,24,903 ஆக உயர்ந்துள்ளது. கடந்த 24 மணி நேரத்தில் கொரோனா பாதிப்பில் இருந்து 9,862 பேர் டிஸ்சார்ஜ் செய்யப்பட்டனர். இதனால், குணமடைந்தவர்களின் மொத்த எண்ணிக்கை 4,27,25,055 ஆக உயர்ந்துள்ளது.