பெங்களூர் விமான நிலையம் செல்லும் சாலையில் விபத்துக்கள் அதிகரிப்பு

Oplus_131072

பெங்களூர் : மே. 16 – நகரின் தேவனஹள்ளியில் உள்ள கெம்பேகௌடா சர்வ தேச விமானநிலையத்திற்கு செல்லும் பெல்லாரி வீதி விபத்துக்கள் நிறைந்த பகுதியாக மாறியுள்ளது. இந்த வீதியில் வெறும் வாகன நெரிசல்கள் மட்டுமின்றி நாளுக்கு நாள் விபத்துக்களின் எண்ணிக்கையும் அதிகரித்து கொண்டே வருகிறது. தவிர விபத்துக்களில் சிக்கி உயிரிழப்பவர்கள் எண்ணிக்கையும் ஆண்டாண்டுக்கு அதிகரித்து வருகிறது. என போக்குவரத்து போலீசார் கவலை தெரிவிக்கின்றனர். இந்த பாதையின் சில சந்திப்புகளில் வாகனங்களை ஓட்டுவதே மிக பெரிய சவாலாக உள்ளது. வாகன நெரிசலை கட்டுப்படுத்த போக்குவரத்து போலீசார் கடும் நடவடிக்கைகள் மேற்கொண்டுவந்திடினும் விபத்துக்களின் எண்ணிக்கை குறைந்தபாடில்லை. விமான நிலையம் மெஜஸ்டிக் பகுதியிலிருந்து 34 கிலோ மீட்டர் தூரத்தில் உள்ள நிலையில் இந்த மார்க்கத்தின் பல சந்திப்புகளில் அடிக்கடி விபத்துக்கள் நடந்தபடியே உள்ளன. ஹெப்பாள் வீதியில் வாகனங்களின் எண்ணிக்கை மிகவும் அதிகரித்துள்ள நிலையில் விமான நிலையம் மற்றும் ஹெப்பாள் பகுதிகளின் சுற்றுப்புறங்களில் உள்ள குடியிருப்புகளுக்கு சென்றடைவது மிகவும் கடினமாகியுள்ளது. விவசாய பல்கலை கழகம் ஜிகேவிகே , எலஹங்கா , பெல்லாரி ஆகிய மார்கங்களுக்கு செல்வது மிகவும் அபாயகரமான நிலையில் உள்ளது. இந்த பகுதிகளில் வாகனங்கள் மிக வேகமாக செல்வதுடன் இதுவே விபத்துகளுக்கு காரணம் என போலீசார் கூறுகின்றனர். அதிவேகமாக செல்லும் வாகனங்களை கண்டு பிடிக்க எட்டு இடங்களில் தானியங்கி காமிராக்கள் பொருத்தப்பட்டுள்ளன. வேகமாக செல்லும் வாகனங்களை இந்த காமிராக்கள் கண்டுபிடிக்கின்றன. தவிர வாகன நெரிசல்களை தவிர்க்க கூடுதல் போக்குவரத்து போலீசாரும் நியமிக்கப்பட்டுள்ளனர். 2021ல் ஹெப்பாள் வீதியில் 43 பேரும் 2023ல் 87 பெரும் சாலை விபத்துக்களில் உயிரிழந்துள்ளனர். இந்தாண்டு வெறும் நான்கே மாதங்களில் 30 பேர் இறந்துள்ளனர். ஹெப்பாள் மார்க்கத்தில் மெட்ரோ திட்ட பணிகள் மிகவும் நிதானமாக நடந்து வரும் நிலையில் அங்கங்கு தடுப்புகள் போடப்பட்டுள்ளன. சாலைகளில் பள்ளங்கள் தோன்றி முழு பகுதியும் குண்டு குழியுமாக உள்ளது. இதுவும் சாலை விபத்துக்களுக்கு காரணமாகும். சரியான நேரத்திற்கு விமான நிலையத்தை சென்றடைய பயண நேரத்தை விட கூடுதலாக இரண்டு மணி நேரங்கள் முன்னதாகவாவது வீட்டிலிருந்து கிளம்ப வேண்டியுள்ளதாக பயணி ஒருவர் தெரிவித்தார். ஹெப்பாள் – கே ஆர் புரம் இடையேயான மேம்பாலத்திற்கு இரண்டு புதிய பாலங்கள் சேர்க்கும் பணியை பி டி ஏ மேற்கொண்டுள்ளது. ஹெப்பாள் மேம்பாலத்தின் கே ஆர் புரம் மேல் சரிவு முழுதுமாக மூடப்பட்டுள்ளது. இதனால் பிரச்சனை மேலும் அதிகரித்துள்ளது. இந்த பணிகள் முடிய இன்னமும் நான்கைந்து மாதங்கள் பிடிக்கும் நிலையில் அதுவரை இதே நிலை தொடரும். இந்த பாதைகளில் பல தனியார் பேரூந்துகள் சாலைகளையே பேரூந்து பிக் அப் மற்றும் டிராப் இடங்களாக மாற்றிக்கொண்டுள்ளன.