மதக் கலவரத்தை தூண்டுவதாக மோடி மீது உயர்நீதிமன்றத்தில் வழக்கு

சென்னை: மே 8: மதக் கலவரத்தை தூண்டும் வகையில் தேர்தல் பிரசாரம் செய்து வரும் பிரதமர் மோடி மீது இந்திய தேர்தல் ஆணையம் உடனடியாக நடவடிக்கை எடுக்க் வேண்டும் என சென்னை உயர்நீதிமன்றத்தில் தமிழ்நாடு காங்கிரஸ் கமிட்டித் தலைவர் செல்வப் பெருந்தகை வழக்குத் தொடர்ந்துள்ளார்.
சென்னை உயர்நீதிமன்றத்தில் செல்வப் பெருந்தகை தாக்கல் செய்த மனுவில், தேர்தல் பிரசாரத்தில் பிரதமர் மோடி மத வெறுப்புகளைத் தூண்டும் வகையில் பேசி வருகிறார். மத கலவரத்தைத் தூண்டும் வகையில் பேசும் பிரதமர் மோடி மீது இந்திய தேர்தல் ஆணையம் உடனடியாக நடவடிக்கை எடுக்க வேண்டும் என வலியுறுத்தப்பட்டுள்ளது.
இந்த மனுவில் பிரதமர் மோடியின் பெயர் சேர்க்கப்பட்டுள்ளதால் வழக்கை எண்ணிட மறுப்பதாக நீதிபதிகள் ஜெகதீஷ் சந்திரா, கலைமதி ஆகியோர் அடங்கிய பெஞ்ச் முன்பாக காங்கிரஸ் தரப்பு வழக்கறிஞர்கள் முறையிட்டனர். அப்போது, மனுவில் உள்ள குறைகளை சரி செய்து புதிய மனுத் தாக்கல் செய்த நீதிபதிகள் உத்தரவிட்டனர்.