தொடரும் போர் பதறும் உலகம்

புதுடெல்லி: மார்ச் 28:
போர் தொடர்ந்து நீடிப்பதால் உலக நாடுகள் பெரும் பதற்றம் அடைந்துள்ளன. கச்சா எண்ணெய் விநியோக பிரச்சனை விஸ்வரூபம் எடுத்துள்ளது பல்வேறு நாடுகளில் எரிவாயு பெட்ரோல் டீசல் தட்டுப்பாடு ஏற்பட்டு உள்ளது. பல்வேறு நாடுகளில் விலை கிடுகிடு என உயர்ந்துள்ளது. இதனால் சர்வதேச அளவில் பொருளாதாரம் ஆட்டம் கண்டுள்ளது இது இந்தியாவையும் பாதித்துள்ளது இனிவரும் காலங்களில் எரிபொருள் பிரச்சனை விஸ்வரூபம் எடுக்கும் என்று அஞ்சப்படுகிறது.
டொனால்ட் டிரம்ப் தலைமையிலான அமெரிக்கா மற்றும் பெஞ்சமின் நெதன்யாகு தலைமையிலான இஸ்ரேல் ஆகியவை இணைந்து ஈரான் மீது தாக்குதல் நடத்தி ஒரு மாதம் நிறைவடைந்துள்ள நிலையில், இந்தப் போர் மத்திய கிழக்கில் பெரும் கொந்தளிப்பை உருவாக்கியுள்ளது. ஆயிரக்கணக்கானோர் உயிரிழந்துள்ளனர், உலகளாவிய எரிபொருள் விலைகள் உயர்ந்துள்ளன. இதன் தாக்கம் இந்தியாவையும் கடுமையாகப் பாதித்துள்ளது.
பிப்ரவரி இறுதியில் அமெரிக்க-இஸ்ரேல் படைகள் ஈரான் தலைநகர் தெஹ்ரான் உட்பட 1,500-க்கும் மேற்பட்ட இலக்குகளைத் தாக்கி அழித்தன. இந்தத் தாக்குதலில் ஈரான் உச்ச தலைவர் அலி கமேனி உட்பட முக்கியத் தலைவர்கள் கொல்லப்பட்டதாகத் தெரிவிக்கப்பட்டுள்ளது. ஆனால், அமெரிக்கா எதிர்பார்த்தது போல மக்கள் கிளர்ச்சி ஏற்படவில்லை. மாறாக, ஈரான் உடனடியாகப் பதில் தாக்குதலைத் தொடங்கியது.
ஈரான் 500-க்கும் மேற்பட்ட ஏவுகணைகள் மற்றும் 2,000-க்கும் மேற்பட்ட ட்ரோன்களைப் பயன்படுத்தி வளைகுடா பிராந்தியத்திலுள்ள அமெரிக்கத் தளங்கள் மீது தாக்குதல் நடத்தியது. போர் 16-க்கும் மேற்பட்ட நாடுகளுக்குப் பரவியுள்ளது. இதனுடன் லெபனான் பகுதியிலும் ஹிஸ்புல்லா மற்றும் இஸ்ரேல் இடையே மோதல்கள் அதிகரித்து, ஆயிரத்திற்கும் மேற்பட்டோர் உயிரிழந்துள்ளனர்.
மூன்றாவது வாரத்திலிருந்து “எரிபொருள் போர்” தீவிரமடைந்தது. ஈரானின் தெற்கு பார்ஸ் எரிவாயு வயல் மற்றும் சவுதி அரேபியாவின் எண்ணெய் சுத்திகரிப்பு நிலையங்கள் மீது பரஸ்பரம் தாக்குதல்கள் நடந்தன. இதனால் உலகளாவிய எண்ணெய் விலைகள் 40 சதவீதத்திற்கும் மேல் உயர்ந்துள்ளன.
உலகளாவிய எரிபொருள் விநியோகத்தின் முக்கியப் பாதையான ஹார்முஸ் ஜலசந்தியை ஈரான் பெரும்பாலும் தனது கட்டுப்பாட்டிற்குள் கொண்டு வந்துள்ளது. உலகின் சுமார் 20 சதவீத எண்ணெய் போக்குவரத்து இந்தப் பாதை வழியாகவே நடக்கிறது. இந்தியாவிற்கு வரும் கச்சா எண்ணெய்யில் சுமார் 50 சதவீதம் இந்தப் பாதையின் வழியாகவே வருகிறது.
சில “நட்பு நாடுகளுக்கு” மட்டுமே இதில் அனுமதி வழங்கப்படுகிறது.
மற்றவர்களுக்குப் பெரும் கட்டணமாக சுமார் 2 மில்லியன் டாலர் விதிக்கப்படுகிறது.
இந்தச் சூழ்நிலையால் இந்தியாவில் சமையல் எரிவாயு தட்டுப்பாடு, அச்சத்தின் காரணமாக மக்கள் அதிகப்படியாக வாங்குதல் மற்றும் உணவகங்கள் தற்காலிகமாக மூடப்படும் நிலை உருவாகியுள்ளது.
போருக்கு மத்தியில் டிரம்ப் மற்றும் நெதன்யாகு இடையிலான கருத்து வேறுபாடுகள் பகிரங்கமாகியுள்ளன. எரிபொருள் உள்கட்டமைப்புகள் மீது தாக்குதல் நடத்தக்கூடாது என்று டிரம்ப் எச்சரித்துள்ளார். போரை முடிவுக்குக் கொண்டு வர அமெரிக்கா தற்காலிகமாகத் தாக்குதலை நிறுத்தி ஏப்ரல் 6 வரை பேச்சுவார்த்தைக்கு வாய்ப்பளித்துள்ளது. ஈரானும் மறைமுகப் பேச்சுவார்த்தைகளை நடத்தி வருகிறது.
ஆனால் பேச்சுவார்த்தை தோல்வியடைந்தால், அமெரிக்கா தரைவழித் தாக்குதலில் இறங்க வாய்ப்புள்ளது. குறிப்பாக ஈரானின் முக்கிய எண்ணெய் ஏற்றுமதி மையமான கார்க் தீவு மீது தாக்குதல் நடத்தப்பட வாய்ப்புகள் அதிகம். ஒரு மாதத்திற்குப் பிறகும் போரின் திசை தெளிவாகத் தெரியவில்லை. எரிபொருள் நெருக்கடி, உலகப் பொருளாதார அழுத்தம் மற்றும் பாதுகாப்பு கவலைகளுக்கு மத்தியில், அடுத்த சில நாட்களே போரின் எதிர்காலத்தைத் தீர்மானிக்கும்.
போரில் யேமன் நுழைவு
மத்திய கிழக்கு மோதல் இரண்டாவது மாதத்தில் கால் பதித்துள்ளது. இதற்கிடையில் ஈரான், இஸ்ரேல் மற்றும் லெபனானில் புதிய தாக்குதல்கள் தொடர்கின்றன. அபுதாபியில் ஏவுகணைத் தடுப்புச் சிதறல்களால் ஏற்பட்ட தீயை அணைக்கும்போது 5 இந்தியர்கள் காயமடைந்தனர். ஈரானுடன் மோதல் தொடங்கிய பிறகு முதல் முறையாக யேமனிலிருந்து இஸ்ரேல் மீது ஏவுகணைத் தாக்குதல் நடத்தப்பட்டுள்ளது.
ஈரான் மீது அமெரிக்கா மற்றும் இஸ்ரேல் இலக்கு வைத்துத் தாக்குதல் நடத்தி வருகின்றன, இதனால் மத்திய கிழக்கு நாடுகளில் மோதல் குறைவதற்கான எந்த அறிகுறிகளும் தென்படவில்லை. ஈரானுக்குள் பல இடங்களில் இஸ்ரேல் முக்கிய உள்கட்டமைப்புகளை இலக்காகக் கொண்டு தாக்குதல் நடத்தியுள்ளது.
ஈரானிய ஏவுகணைகள் இஸ்ரேலை மட்டுமல்லாமல் ஐக்கிய அரபு அமீரகத்தையும் இலக்கு வைத்துள்ளன. அமீரகத்தில் ஏவுகணைச் சிதறல்களால் குறைந்தது இருவர் உயிரிழந்துள்ளனர். ஈரானின் புரட்சிகர பாதுகாப்புப் படை கடற்படைத் தளபதி அலிரேசா தங்சிரியைத் தாக்குதலில் கொன்றதாக இஸ்ரேல் உரிமை கோரியுள்ளது.
இதற்கிடையில் கருத்து தெரிவித்துள்ள அமெரிக்க அதிபர் டொனால்ட் டிரம்ப், இஸ்ரேல் லெபனானிலும் நடவடிக்கைகளைத் தீவிரப்படுத்தியுள்ளது என்றும், ஈரானியத் தலைவர்கள் ஒப்பந்தம் செய்து கொள்ளக் கெஞ்சுகிறார்கள் என்றும் கூறியுள்ளார்.
தேவைப்பட்டால் அமெரிக்கா மேலும் தாக்குதல் நடத்தும். தற்போதைக்கு ஏப்ரல் 6 வரை ஈரானின் எரிபொருள் நிலையங்கள் மீது தாக்குதல் நடத்தப்படாது என்று கூறிய அவர், பாகிஸ்தான் மத்தியஸ்தராகச் செயல்படும் 15 அம்ச அமைதித் திட்டத்தை அமெரிக்கா முன்வைத்துள்ளது என்றார். ஈரான் இந்தத் திட்டத்தை “ஒருதலைப்பட்சமானது மற்றும் அநீதியானது” என்று நிராகரித்துள்ளது.