பெங்களூரு: ஏப்ரல் 6 –
பெங்களூரு அருகே உள்ள ஏரியில், மதுபோதையில் நீந்த சென்ற ஒருவர் நீரில் மூழ்கி உயிரிழந்தார். வெயில் தாங்க முடியாமல் இவர் ஏரியில் நீந்தியதாகவும் அதே சமயம் இவர் மது அருந்தி இருந்ததாகவும் கூறப்படுகிறது.
லிங்கராஜ்புராவைச் சேர்ந்த பிரபு (30) என்பவர், நேற்று மதியம் மது அருந்திய பின்னர், கோபாலபுரா ஏரியில் நீந்தச் சென்றுள்ளார். அவருடன் தனியார் நிறுவனத்தில் பணிபுரியும் விஜி மற்றும் பிற நண்பர்களும் சென்றுள்ளனர். அப்போது பிரபு, நீரில் மூழ்கி உயிரிழந்தார்.
உடனடியாக, அவரது நண்பர் விஜி தீயணைப்புப் படைக்கும் காவல் நிலையத்திற்கும் தகவல் தெரிவித்தார். உடனடியாக சம்பவ இடத்திற்கு விரைந்த தீயணைப்புப் படையினர், உள்ளூர் நீச்சல் வீரர்களுடன் மாலை முழுவதும் தேடினர், ஆனால் சடலம் கிடைக்கவில்லை.
இன்று காலை சடலம் மீட்கப்பட்டது. பெங்களூரு காவல்துறை வழக்குப் பதிவு செய்து மேலும் விசாரணை நடத்தி வருகிறது.
இதே போல் கெங்கேரி, கோணசத்ராவில் உள்ள ஏரியில் குதித்து மனநலம் பாதிக்கப்பட்ட முசாஃபர் பாஷா (35) தற்கொலை செய்துகொண்டார்.
மனநலம் பாதிக்கப்பட்ட முசாஃபர் பாஷா, சில நாட்களுக்கு முன்பு சிகிச்சைக்காக நிம்ஹான்ஸ் மருத்துவமனையில் அனுமதிக்கப்பட்டார்.
சிகிச்சைக்குப் பிறகு வீடு திரும்பிய முசாஃபர் பாஷா, முழுமையாகக் குணமடையவில்லை. வீட்டில் யாரும் இல்லாதபோது வெளியே சென்ற அவர், ஏரியில் குதித்துத் தற்கொலை செய்துகொண்டார். மற்றொரு சம்பவத்தில், கெங்கேரி புறநகர்ப் பகுதியில் ஒரு வீட்டைப் புதுப்பிக்கும் பணியில் ஈடுபட்டிருந்தபோது, மேல் மாடியில் இருந்து வழுக்கி விழுந்ததில் ஹனுமா ரெட்டி (60) உயிரிழந்தார்.
நேற்று மதியம், வீட்டின் புதுப்பிப்புப் பணிகளைப் பார்வையிட மாடிக்குச் சென்ற ஹனுமா ரெட்டி கீழே விழுந்தார். கெங்கேரி காவல்துறையினர் இரண்டு வழக்குகள் பதிவு செய்து விசாரித்து வருகின்றனர்.
