தொழிலதிபர் தற்கொலை:இருவர் மீது எப்.ஐ.ஆர் பதிவு

பெங்களூரு: ஏப்ரல் 24 –
கட்டுமானப் பணியில் உள்ள கட்டிடத்திலிருந்து குதித்து விவேகானந்தர் என்பவர் தற்கொலை செய்துகொண்ட விவகாரம் தொடர்பாக, இரண்டு பேர் மீது சம்பிகேஹள்ளி காவல் நிலையத்தில் எப்.ஐ.ஆர் (முதல் தகவல் அறிக்கை) பதிவு செய்யப்பட்டுள்ளது.
முதலீட்டாளர்களின் அழுத்தம் காரணமாகவே தனது கணவர் தற்கொலை செய்து கொண்டதாக அவரது மனைவி குற்றம் சாட்டியுள்ளார். விவேகானந்தர் ‘இன்விஷன் பெங்களூரு’ (Invision Bengaluru) என்ற நிறுவனத்தை நடத்தி வந்தார். பல்வேறு திட்டங்களில் முதலீடு செய்வதற்காக மக்களிடமிருந்து கோடிக்கணக்கான ரூபாய் பணத்தை அவர் திரட்டியிருந்தார்.
திரட்டப்பட்ட அந்தப் பணத்தை விவேகானந்தர் பங்குச் சந்தையில் முதலீடு செய்து வந்தார். ஆனால், பங்குச் சந்தையில் அவருக்கு பெரும் நஷ்டம் ஏற்பட்டது. இதனால் பணத்தை முதலீடு செய்தவர்கள், தங்கள் பணத்தைத் திருப்பித் தருமாறு அவருக்கு அழுத்தம் கொடுத்து வந்துள்ளனர். இந்த மனஉளைச்சல் காரணமாகவே அவர் தற்கொலை செய்து கொண்டதாக மனைவி அர்ச்சனா ஷெட்டி புகார் அளித்துள்ளார்.
தனது கணவரை தற்கொலைக்குத் தூண்டியதாக அர்ச்சனா ஷெட்டி அளித்த புகாரின் அடிப்படையில், சம்பிகேஹள்ளி போலீசார் இரண்டு பேர் மீது வழக்குப் பதிவு செய்துள்ளனர். பாரதிய நியாய சன்ஹிதாபிரிவு 108-ன் கீழ் வழக்குப்பதிவு செய்து போலீசார் விசாரணை நடத்தி வருகின்றனர்.