வாராணசி: ஜனவரி 12-
உத்தர பிரதேசத்தின் பள்ளிகள், கல்லூரிகளில் தமிழ் பாட வகுப்புகளை தொடங்க அந்த மாநில அரசு திட்டமிட்டு உள்ளது.
உத்தர பிரதேசத்தின் வாராணசியில் கடந்த டிசம்பர் 2-ம் தேதி முதல் 15-ம் தேதி வரை தமிழ் கற்கலாம் என்ற கருப்பொருளுடன் காசி தமிழ்ச் சங்கமம் 4.0 நிகழ்ச்சி நடைபெற்றது. இதில் முதல்வர் ஆதித்யநாத் பேசும்போது, “உத்தர பிரதேச பாடத்திட்டத்தில் தமிழ் உள்ளிட்ட தென்னிந்திய மொழிகள் சேர்க்கப்படும்” என்று தெரிவித்தார்.
கடந்த டிசம்பர் 28-ம் தேதி மனதின் குரல் நிகழ்ச்சியில் பிரதமர் மோடி பேசும்போது, “காசி தமிழ்ச் சங்கமத்தின் ஒரு பகுதியாக வாராணசியின் குயீன் கல்லூரியைச் சேர்ந்த மாணவி பாயல் படேல் தமிழ் மொழியை கற்று வருகிறார். வாராணசியின் 50-க்கும் மேற்பட்ட பள்ளிகளில் தமிழ் கற்கலாம் என்ற சிறப்பு இயக்கம் நடத்தப்பட்டது. பிஜி தீவு முதல் காசி வரை மக்களின் மனங்களை தமிழ் ஒன்றிணைக்கிறது” என்று தெரிவித்தார்.
உ.பி. அரசு வட்டாரங்கள் கூறும்போது, “பிரதமர் மோடி, முதல்வர் ஆதித்யநாத்தின் முயற்சியால் உ.பி. பள்ளிகள், கல்லூரிகளில் தமிழ் பாட வகுப்புகளை தொடங்க திட்டமிடப்பட்டு உள்ளது. முதல் கட்டமாக வாரணாசி பள்ளி, கல்லூரிகளில் தமிழ் வகுப்புகள் தொடங்கப்பட்டு வருகின்றன. மேலும் வாரணாசியை சேர்ந்த 50 ஆசிரியர்கள் தமிழகம் சென்று இந்தி பாட வகுப்புகளை நடத்த உள்ளனர்” என்று தெரிவித்தன.
