தேர்தலுக்குப் பிந்தைய கருத்துக்கணிப்பில் நெதன்யாகுவுக்கு பின்னடைவு

ஜெருசலேம், அக். 28-
2023ஆம் ஆண்டு இஸ்ரேல் மீது ஹமாஸ் பயங்கரவாத அமைப்பினர் நடத்திய தாக்குதலுக்குப் பிறகு, பிரதமர் பதவிக்கான பொதுத்தேர்தல் இஸ்ரேலில் நடைபெற்றது. இந்தத் தேர்தலில் முன்னெப்போதும் இல்லாத அளவுக்கு வாக்குகள் பதிவாகியிருந்ததாக தெரிவிக்கப்பட்டுள்ளது. சுமார் 20 ஆண்டுகளாக பிரதமராகப் பதவி வகித்து வரும் பெஞ்சமின் நெதன்யாகு, இஸ்ரேலில் நீண்ட காலம் அந்தப் பதவியில் இருந்தவர் என்ற பெருமையைப் பெற்றுள்ளார். ஹமாஸ் மற்றும் ஈரான் ஆகிய எதிரிகளை எதிர்த்துப் போராடுவதாக உறுதியளித்து அவர் தேர்தல் பிரசாரத்தில் ஈடுபட்டார். இந்நிலையில், தேர்தலுக்குப் பிந்தைய கருத்துக்கணிப்பு முடிவுகள் நெதன்யாகுவுக்கு பின்னடைவை ஏற்படுத்தியுள்ளன. முன்னாள் ராணுவத் தலைவரான காடி ஐசென்காட் தலைமையிலான கூட்டணி, நெதன்யாகுவின் கூட்டணி கட்சிகளைவிட சிறிய அளவில் முன்னிலை பெற்றுள்ளதாக கருத்துக்கணிப்பில் குறிப்பிடப்பட்டுள்ளது. கருத்துக்கணிப்பு முடிவுகளின்படி, எதிர்க்கட்சிக் கூட்டணி 52 முதல் 53 இடங்களையும், நெதன்யாகு தலைமையிலான கூட்டணி 50 இடங்களையும் பெறக்கூடும் எனத் தெரிவிக்கப்பட்டுள்ளது. இருப்பினும், நெதன்யாகுவின் லிக்குட் கட்சி 25 இடங்களுடன் நாடாளுமன்றத்தில் தனிப்பெரும் கட்சியாகத் தொடரும் என்றும் கருத்துக்கணிப்பில் தெரியவந்துள்ளது.