புதுடெல்லி: பிப்ரவரி 26-
தேசிய கல்வி ஆராய்ச்சி மற்றும் பயிற்சி கவுன்சில் (என்சிஇஆர்டி), அண்மையில் வெளியிட்ட 8-ம் வகுப்பு சமூக அறிவியல் பாடப் புத்தகத்தில் நீதித்துறை ‘ஊழல்’ குறித்து தெரிவிக்கப்பட்ட கருத்துக்கு உச்ச நீதிமன்றத்தில் மத்திய அரசு மன்னிப்பு கோரியது.
இந்த வழக்கில் இன்று (பிப்.26) ஆஜரான சொலிசிட்டர் ஜெனரல் துஷார் மேத்தா, ‘‘பாடப் புத்தகத்தில் ஆட்சேபனைக்குரிய கருத்துக்கள் இடம் பெற்றது குறித்த தகவல் வெளியானதும் அதை அரசு தீவிரமாக எடுத்துக்கொண்டு, உடனடியாக செயல்பட்டுள்ளது.
அந்தப் புத்தகத்தில் அந்த அத்தியாயம் இடம்பெறக் காரணமாக இருந்த இரண்டு நபர்களும் இந்த அமைச்சகத்தின் எந்த ஒரு நடவடிக்கையிலும் ஈடுபட மாட்டார்கள். வேறு எந்த அமைச்சகத்திலும்கூட அவர்களுக்கு பங்கு இருக்காது. நீதிமன்றத்துக்கு எதிரான நிலைப்பாட்டை மத்திய அரசு எடுக்கவில்லை’’ என தெரிவித்தார்.
அப்போது பேசிய தலைமை நீதிபதி சூர்ய காந்த், ‘‘இந்த விவகாரத்தில் நாங்கள் ஆழமான விசாரணையை நடத்த விரும்புகிறோம். நீதித்துறையின் தலைவர் என்ற முறையில், இதற்கு காரணமானவர்களை பொறுப்பேற்க வைப்பது எனது கடமை. தலைகள் உருள வேண்டும்(காரணமானவர்கள் தண்டிக்கப்பட வேண்டும்). சில நடவடிக்கைகள் எடுக்கப்படும் வரை இந்த வழக்கை நான் முடிக்க மாட்டேன். இதற்குப் பின்னால் உள்ளவர்கள் யார் என்பதை நாங்கள் அறிய விரும்புகிறோம்’’ என தெரிவித்தார்.
மேலும் அவர், ‘‘நீதித்துறையின் நேர்மையை அவதூறு செய்யவோ அல்லது குறைமதிப்புக்கு உட்படுத்தவோ உச்ச நீதிமன்றம் அனுமதிக்காது. நீதித்தறை ஊழல் நிறைந்தது என்று நீங்கள் முழு ஆசிரியர் சமூகத்துக்கும் மாணவர் சமூகத்துக்கும் கற்பித்தால் அது எத்தகைய செய்தியை வழங்கும். ஆசிரியர்கள் அதைக் கற்றுக்கொள்வார்கள். மாணவர்களும் அதை கற்றுக்கொள்வார்கள்.
வெளியிடப்பட்ட அந்த புத்தகங்கள் திரும்பப் பெறப்பட்டதாக அரசாங்கம் தரப்பில் கூறினாலும், அது தொடர்ந்து பரவலாகப் பரப்பப்பட்டு வருகிறது. அந்த புத்தகங்கள் சந்தையில் கிடைக்கின்றன. சமூக ஊடகங்களிலும் உள்ளது. இதனால், இன்று நீதித்துறை ரத்தம் சிந்துகிறது. புத்தகத்தின் அனைத்து நகல்களையும் அரசு உடனடியாக பறிமுதல் செய்ய வேண்டும்’’ என்று உத்தரவிட்டார்.
இந்த விவகாரத்தை எழுப்பிய மூத்த வழக்கறிஞர் கபில் சிபல், ‘‘நீதித்துறை குறித்த அத்தியாயத்தின் PDF பதிப்பு ஏற்கனவே பரவலாக உள்ளது. புத்தகத்தைவிட இது அதிக அளவில் பரவி வருகிறது’’ என தெரிவித்தார்.
அப்போது பேசிய நீதிபதி ஜாய்மல்யா பாக்சி, ‘‘இந்த அத்தியாயத்தின் PDF ஆன்லைனில் தொடர்ந்து பரவி வருகிறது. அரசாங்கம் இதை கவனத்தில் எடுத்து செயல்பட வேண்டும். டிஜிட்டல் தளத்தில் உள்ளவற்றை நீக்க அரசாங்கம் உத்தரவுகளைப் பிறப்பிக்க வேண்டும். இந்த அத்தியாயம் சட்ட உதவி அல்லது நீதிக்கான அணுகலைப் பற்றி பேசவில்லை. மாறாக, பிரச்சினையைப் பற்றி மட்டும் பேசுகிறது’’ என குறிப்பிட்டார். ‘‘நீதித்துறை தொடர்பாக புத்தகத்தில் இடம் பெற்றுள்ள அத்தியாயம் பொறப்பற்றது. நீதித்துறையை அவமதிக்கக்கூடியது. இதை உணராமல் NCERT கவுன்சில் இயக்குநர் அதை ஆதரித்தார். நீதித்துறையின் கண்ணியத்தை இழிவுபடுத்துவதற்கும், குறைமதிப்புக்கு உட்படுத்துவதற்குமான திட்டமிடப்பட்ட நடவடிக்கை இது. இதை சரி செய்யாவிட்டால், நீதித்துறை மீதான பொதுமக்களின் குறிப்பாக மாணவர்களின் நம்பிக்கை சிதையக்கூடும்’’ என்று நீதிபதிகள் தெரிவித்தனர்.
பின்னணி: தேசிய கல்வி ஆராய்ச்சி மற்றும் பயிற்சி கவுன்சில் (என்சிஇஆர்டி), அண்மையில் வெளியிட்டுள்ள 8ம் வகுப்பு சமூக அறிவியல் பாடப் புத்தகத்தில் நீதித்துறை குறித்த பாடமும் இடம்பெற்றுள்ளது. அந்த பாடத்தில், நீதித்துறை அமைப்புக்குள் உள்ள ஊழலையும், குறிப்பாக பொருளாதார ரீதியாக நலிவடைந்த பிரிவினருக்கு நீதி கிடைப்பதில் அதன் தாக்கம் குறித்தும் விவாதிக்கிறது. அதில், உச்ச நீதிமன்றத்தில் மட்டும் 81 ஆயிரம் வழக்குகள் தேங்கியிருப்பதாகவும், உயர் நீதிமன்றங்களில் 62.40 லட்சம் வழக்குகள் நிலுவையில் இருப்பதாகவும், மாவட்டம் மற்றும் சார்பு நீதிமன்றங்களில் மொத்தம் 4.70 கோடி வழக்குகள் தேங்கி இருப்பதாகவும் சுட்டிக்காட்டப்பட்டுள்ளது. மேலும், இந்தப் பாடத்தில் நீதித்துறையின் பல்வேறு மட்டங்களில் மக்கள் ஊழலை எதிர்கொள்ள வேண்டியுள்ளது. ஏழைகள் மற்றும் சமூகத்தில் பின்தங்கியவர்களுக்கு, இது நீதியை அணுகுவதில் உள்ள சிக்கலை மோசமாக்கி வருகிறது. எனவே, தொழில் நுட்பத்தைப் பயன்படுத்துவதன் மூலம் நீதித்துறை அமைப்பில் நம்பிக்கையை வளர்க்கவும் வெளிப் படைத்தன்மையை அதிகரிக்கவும், ஊழல் சம்பவங்கள் எங்கு எழுந்தாலும் அவற்றை எதிர்த்து விரைவான மற்றும் தீர்க்கமான நடவடிக்கை எடுக்கவும் மாநில மற்றும் யூனியன் பிரதேச நிலையில் தொடர்ந்து முயற்சிகள் மேற்கொள்ளப்பட்டு வருவதாகவும் என்சிஇஆர்டி பாடத்தில் தெரிவிக்கப்பட்டுள்ளது.
