புதுடெல்லி: ஆகஸ்ட் 5-
ஓடிபி எண்ணைப் பயன்படுத்தி ஓரணியில் தமிழ்நாடு உறுப்பினர் சேர்க்கைக்கு உயர் நீதிமன்ற மதுரை கிளை விதித்த தடையை நீக்கக்கோரி திமுக தரப்பில் தாக்கல் செய்யப்பட்ட மேல்முறையீட்டு மனுவை உச்ச நீதிமன்றம் தள்ளுபடி செய்துள்ளது.
தமிழகம் முழுவதும் திமுகவினர் நடத்தும் ‘ஓரணியில் தமிழ்நாடு’ என்ற உறுப்பினர் சேர்க்கை முகாமின்போது பொதுமக்களிடமிருந்து ஆதார் உள்ளிட்ட விவரங்கள் மூலமாக ‘ஓடிபி’ எண்ணைப் பெறக்கூடாது என உயர் நீதிமன்ற மதுரை கிளை இடைக்காலத்தடை விதித்து உத்தரவிட்டிருந்தது.
இதை எதிர்த்து திமுக வழக்கறிஞர் அனுராதா அற்புதம் உச்ச நீதிமன்றத்தில் தாக்கல் செய்திருந்த மேல்முறையீட்டு மனு: ஓரணியில் தமிழ்நாடு உறுப்பினர் சேர்க்கை முகாமின்போது உண்மைத்தன்மையை உறுதி செய்யவே ஓடிபி பெறப்படு்கிறது. பிரதான எதிர்க்கட்சியான அதிமுக நடைபெறவுள்ள சட்டப்பேரவைத் தேர்தலை மனதில் கொண்டு பொதுமக்களுக்கு திமுக தொல்லை அளித்து வருவதாகக்கூறி இதுபோன்ற தடைகளை ஏற்படுத்தி வருகிறது.
