பெங்களூரு, ஏப்ரல்.1-
பேட்டரியில் இயங்கும் கார்கள், ஜீப்புகள், மற்றும் தனியார் சேவை வாகனங்களுக்கு வழங்கப்பட்டு வந்த 100 சதவீத சாலை வரி விலக்கை முடிவுக்குக் கொண்டுவர கர்நாடக மாநில அரசு முடிவு செய்துள்ளதால், மாநிலத்தில் மின்சார வாகனங்களின் விலை விரைவில் உயர உள்ளது.
கர்நாடக மோட்டார் வாகன வரி (திருத்த) மசோதா, 2026-இன் படி, வாகனப் பதிவின் போது செலுத்த வேண்டிய வாழ்நாள் வரியானது, தற்போது வாகனத்தின் விலைக்கு ஏற்ப நிர்ணயிக்கப்பட்டுள்ளது.ரூ. 10 லட்சம் வரையிலான வாகனங்களுக்கு 5 சதவீத வரியும், ரூ. 10 லட்சம் முதல் ரூ. 25 லட்சம் வரையிலான வாகனங்களுக்கு 8 சதவீத வரியும், ரூ. 25 லட்சத்திற்கு மேற்பட்ட வாகனங்களுக்கு 10 சதவீத வரியும் விதிக்கப்படும்.மின்சார வாகனங்களின் பயன்பாட்டை ஊக்குவிப்பதற்காக, மாநில அரசு மார்ச் 2016 முதல் அனைத்து மின்சார வாகனங்களுக்கும் சாலை வரியிலிருந்து முழுமையாக விலக்கு அளித்திருந்தது. 2024 முதல், ரூ. 25 லட்சத்திற்கும் அதிகமான விலை கொண்ட மின்சார வாகனங்களுக்கு மட்டுமே வரி விதிக்கப்பட்டு வந்தது. ஆனால் இப்போது அனைத்து மின்சார வாகனங்களுக்கும் இந்த வரி பொருந்தும். உலகளாவிய அரசியல் பதட்டங்கள் காரணமாக எரிபொருள் விலைகள் உயர்ந்து, மக்கள் மின்சார வாகனங்களை நாடி வரும் இக்காலகட்டத்தில், அரசின் இந்த முடிவு கொள்கையில் ஒரு பெரிய மாற்றமாகும்.செயலாளர் என்.வி. பிரசாத் கூறுகையில், “இந்த மசோதா சட்டமன்றத்தில் நிறைவேற்றப்பட்டுள்ளது. ஆளுநரின் ஒப்புதலுக்குப் பிறகு இது அதிகாரப்பூர்வமாக அமலுக்கு வரும்” என்றார்.
போக்குவரத்துத் துறை அதிகாரி ஒருவர் கூறுகையில், “மின்சார வாகனங்களின் விற்பனை தற்போது வரி விலக்குகளை காலவரையின்றித் தொடர முடியாத ஒரு நிலையை எட்டியுள்ளது. இருப்பினும், பெட்ரோல்/டீசல் வாகனங்களுடன் ஒப்பிடும்போது மின்சார வாகனங்களுக்கான வரி விகிதம் குறைவாக இருக்கும்” என்றார்
