காரவார்: மே 26-
தாண்டேலி தாலுகாவில் உள்ள பொம்மனஹள்ளி நீர்த்தேக்கத்தில் காட்டுயானை ஒன்று நேற்று சடலமாக மீட்கப்பட்டுள்ளது பெரும் பரபரப்பை ஏற்படுத்தியுள்ளது.
சுமார் 9 முதல் 10 வயது மதிக்கத்தக்க ஆண் யானை ஒன்று, நீர்த்தேக்கத் தண்ணீரில் சடலமாக மிதப்பதைக் கண்டு அதிர்ச்சியடைந்த அப்பகுதி மக்கள் உடனடியாக வனத்துறைக்குத் தகவல் கொடுத்தனர்.
தகவல் அறிந்ததும் சம்பவ இடத்திற்கு விரைந்து வந்த வனத்துறை அதிகாரிகள் மற்றும் ஊழியர்கள், தீவிரப் போராட்டத்திற்குப் பிறகு யானையின் உடலை நீரிலிருந்து வெளியே எடுத்தனர்.
அதைத் தொடர்ந்து, கால்நடை மருத்துவக் குழுவினரின் முன்னிலையில் சம்பவ இடத்திலேயே யானையின் உடல் பிரேதப் பரிசோதனை செய்யப்பட்டது. யானையின் இறப்பிற்கான துல்லியமான காரணம் என்ன என்பது பிரேதப் பரிசோதனை அறிக்கை வந்த பிறகே தெரியவரும் என்றும், இதுகுறித்து மேல் விசாரணை நடத்தப்படும் என்றும் வனத்துறை அதிகாரிகள் தெரிவித்துள்ளனர்.
