பெங்களூரு, ஆக. 31:
பெங்களூரு நகரில் சட்டவிரோதமாக தங்கியிருந்த 31 வங்கதேசத்தினரை நாடுகடத்தும் நடவடிக்கைக்காக, காவல்துறையினர் அவர்களை மேற்கு வங்க மாநிலம் மால்தாவுக்கு அனுப்பி வைத்தனர்.
பெங்களூரின் 10 பல்வேறு காவல் நிலைய எல்லைக்குட்பட்ட பகுதிகளில் பிடிபட்ட இந்த 31 சட்டவிரோத ஊடுருவல்காரர்களும், சர் எம். விஸ்வேஸ்வரய்யா டெர்மினல் ரயில் நிலையத்திலிருந்து பலத்த போலீஸ் பாதுகாப்புடன் ரயில் மூலம் அனுப்பி வைக்கப்பட்டனர்.
20 போலீசார் பாதுகாப்பு
பயணத்தின் போது எந்தவித அசம்பாவிதமும் நடக்காமல் இருக்க, 20 போலீசார் கொண்ட தனிப்படை இந்த 31 பேரையும் அழைத்துச் செல்கிறது. இந்த குழு மேற்கு வங்கத்தின் மால்தா ரயில் நிலையத்தை அடையும் என எதிர்பார்க்கப்படுகிறது. அங்கு சென்றடைந்த பிறகு, முறைப்படி நாடுகடத்தும் அடுத்த கட்ட நடவடிக்கைகளை அதிகாரிகள் பூர்த்தி செய்வார்கள்.
பெங்களூரு நகர காவல்துறை தொடங்கியுள்ள ‘ஆபரேஷன் புக்தா’ என்ற சிறப்பு வேட்டையின் கீழ் இந்த நடவடிக்கை எடுக்கப்பட்டுள்ளது. எலக்ட்ரானிக் சிட்டி மற்றும் வொயிட்ஃபீல்டு மண்டலங்கள் உட்பட நகரின் பல்வேறு பகுதிகளில் 500-க்கும் மேற்பட்ட போலீசார் அடங்கிய 23 சிறப்பு படைகள், 30-க்கும் மேற்பட்ட தற்காலிக கூடாரங்கள் மற்றும் கட்டிட கட்டுமானப் பகுதிகளில் ஒரே நேரத்தில் அதிரடி சோதனை நடத்தின.
1,900 பேரிடம் விசாரணை
இந்த அதிரடி வேட்டையில் மொத்தம் 1,900-க்கும் மேற்பட்ட சந்தேகத்திற்குரிய நபர்கள் பிடிபட்டு, அவர்களின் ஆதார், பாஸ்போர்ட் மற்றும் விசா ஆவணங்கள் தீவிர தணிக்கை செய்யப்பட்டன. இதில் பெகூரு, பரப்பன அகரஹாரா மற்றும் வொயிட்ஃபீல்டு பகுதிகளில் கண்டறியப்பட்ட வங்கதேசத்தினரை நாடுகடத்த உத்தரவிடப்பட்டது.
தகுந்த ஆவணச் சரிபார்ப்பு இல்லாமல் சட்டவிரோத ஊடுருவல்காரர்களுக்கு வாடகைக்கு வீடு அல்லது கூடாரம் கொடுக்கும் உரிமையாளர்கள் மீதும் சட்டப்படி கடும் நடவடிக்கை எடுக்கப்படும் என்று எலக்ட்ரானிக் சிட்டி துணை கமிஷனர் எம். நாராயண் மற்றும் வொயிட்ஃபீல்டு துணை கமிஷனர் சைதுலு அடாவத் எச்சரித்துள்ளனர்.
வீட்டு உரிமையாளர்களுக்கு எச்சரிக்கை
ஏற்கனவே இது தொடர்பாக பல வழக்குகள் பதிவு செய்யப்பட்டுள்ளன. பெங்களூரு நகர காவல் கமிஷனர் சீமந்த் குமார் சிங் கூறும்போது, “நகரில் சட்டவிரோதமாக தங்கியிருக்கும் சந்தேகத்திற்குரிய நபர்கள் பற்றி தகவல் தெரிந்தால் பொதுமக்கள் உடனடியாக போலீசாருக்கு தெரிவிக்க வேண்டும். ஆனால், எந்தக் காரணத்தைக் கொண்டும் பொதுமக்கள் சட்டத்தை கையில் எடுக்கக் கூடாது; சமூக வலைதளங்களில் தேவையில்லாத வதந்திகளையும் பரப்பக் கூடாது” என்று திட்டவட்டமாகத் தெரிவித்துள்ளார்.
மேலும், பொதுமக்கள் எந்தத் தகவல் வைத்திருந்தாலும் அதை சட்ட வரம்பிற்குள்ளேயே போலீசாருக்கு அளிக்க வேண்டும் என்றும் கமிஷனர் கேட்டுக்கொண்டுள்ளார்.
பிடிபட்ட 31 பேரும் மால்தாவுக்கு அழைத்துச் செல்லப்படுவதாகவும், அங்கு நாடுகடத்தல் விதிமுறைகளின்படி அடுத்த கட்ட நடவடிக்கை எடுக்கப்படும் என்றும் எலக்ட்ரானிக் சிட்டி துணை கமிஷனர் எம். நாராயண் தெரிவித்துள்ளார்.
