ராஜ்கிர், ஆகஸ்ட் 30- ஆசிய கோப்பை ஆடவர் ஹாக்கியில் இந்திய அணி தனது முதல் ஆட்டத்தில் 4-3 என்ற கோல் கணக்கில் சீனாவை வீழ்த்தியது. கேப்டன் ஹர்மன்பிரீத் ஹாட்ரிக் கோல் அடித்தார். பிஹார் மாநிலம் ராஜ்கிர் பகுதியில் நடைபெற்று வரும் இந்தத் தொடரில் தொடக்க நாளான நேற்று ‘ஏ’ பிரிவில் உள்ள இந்திய அணி தனது முதல் லீக் ஆட்டத்தில் சீனாவுடன் மோதியது. இதில் இந்திய அணி 4-3 என்ற கோல் கணக்கில் வெற்றி பெற்றது. இந்திய அணி சார்பில் கேப்டன் ஹர்மன்பிரீத் 20, 33 மற்றும் 47-வது நிமிடங்களில் கிடைத்த பெனால்டி கார்னர் வாய்ப்புகளை கோல்களாக மாற்றினார். ஆனால் அதேவேளையில் அவர், பெனால்டி ஸ்டிரோக்கில் கோல் அடிக்க கிடைத்த எளிதான வாய்ப்பை தவறவிட்டார். முன்னதாக 18-வது நிமிடத்தில் ஜுக்ராஜ் சிங் பெனால்டி கார்னர் வாய்ப்பில் கோல் அடித்து பலம் சேர்த்திருந்தார். 11 பெனால்டி கார்னர் வாய்ப்புகளில், நான்கை மட்டுமே இந்திய அணியால் கோலாக மாற்ற முடிந்தது சீன அணி தரப்பில் ஷிஹாவோ டு (12-வது நிமிடம்), பென்ஹால் சென் (35-வது நிமிடம்), ஜிஷெங் காவ் (41-வது நிமிடம்) ஆகியோர் தலா ஒரு கோல் அடித்தனர். மற்ற ஆட்டங்களில் கொரியா 7-0 என்ற கணக்கில் சீன தைபேவையும், ஜப்பான் 6-0 என்ற கணக்கில் கஜகஸ்தானையும், மலேசியா 4-1 என்ற கணக்கில் வங்கதேசத்தையும் தோற்கடித்தன. இந்தியா தனது 2-வது ஆட்டத்தில் நாளை ஜப்பானுடன் மோதுகிறது.
