மக்காவ், ஆகஸ்ட் 1- மக்காவ் ஒபன் பாட்மிண்டன் தொடரில் இந்தியாவின் தருண் மன்னே பள்ளி, போட்டி தரவரிசையில் முதலிடத்தில் இருந்த ஹாங் காங்கின் லீ சியூக் யியு-வை வீழ்த்தி கால் இறுதி சுற்றுக்கு முன்னேறினார்.சீனாவின் மக்காவ் நகரில் நடைபெற்று வரும் இந்தத் தொடரில் ஆடவர் ஒற்றையர் பிரிவு 2-வது சுற்றில் 47-ம் நிலை வீரரான இந்தியாவின் தருண் மன்னேபள்ளி, போட்டித் தரவரிசையில் முதலிடத்திலும், உலகத் தரவரிசையில் 15-வது இடத்திலும் உள்ள ஹாங் காங் கின் லீ சியூக் யியு-வை எதிர் கொண்டார். ஒரு மணி நேரம் நடைபெற்ற இந்த ஆட்டத்தில் 23 வயதான தருண் 19-21, 21-14, 22-20 என்ற செட் கணக்கில் போராடி வெற்றி பெற்று கால் இறுதி சுற்றுக்கு முன்னேறினார். கால் இறுதி சுற்றில் தரவரிசையில் 87-வது இடத்தில் உள்ள சீனாவின் ஹூ ஹி அன்னுடன் மோதுகிறார் தருண். காமன்வெல்த் விளையாட்டு சாம்பியனான இந்தியாவின் லக்ஷயா சென் 2-வது சுற்றில் இந்தோனேஷியாவின் ஷிகோ ஆரா டுவி வார்டோயோவுடன் மோதினார்.இதில் லக்ஷயா சென் 21-14, 14-21, 21-17 என்ற செட் கணக்கில் வெற்றி பெற்று கால் இறுதி சுற்றில் கால்பதித்தார். மற்றொரு இந்திய வீரரான ஆயுஷ் ஷெட்டி 18-21, 16-21 என்ற செட் கணக்கில் மலேசியாவின் ஜஸ்டின் ஹோவிடம் தோல்வி அடைந்தார். லப்பு இரட்டையர் பிரிவு: மகளிர் ஒற்றையர் பிரிவு 2-வது சுற்றில் இந்தியாவின் ரக்ஷிதா ராம்ராஜ் 21-14, 10-21, 11-21 என்ற செட் கணக்கில் தாய்லாந்தின் புசானன் ஓங்பம்ருங்ஃபானிடம் வீழ்ந்தார். இந்த ஆட்டம் 51 நிமிடங்கள் நடைபெற்றது. கலப்பு இரட்டையர் பிரிவில் இந்தியாவின் துருவ் கபிலா, தனிஷா கிரஸ்டோ ஜோடி 21-19, 13-21, 18-21 என்ற செட் கணக்கில் மலேசியாவின் ஜிம்மி வாங்க், லாய் பெய்ஜிங் ஜோடியிடம் தோல்வி அடைந்தது.
