தட்சிண கன்னடா, ஆகஸ்ட் 24-தர்மஸ்தலா குறித்து பொய் புகார்கள் கூறி கைது செய்யப்பட்டு உள்ள முகமூடி நபரிடம் சிறப்பு விசாரணை குழு எஸ்ஐடி அதிகாரிகள் தீவிர விசாரணை நடத்தி வருகின்றனர். இவரது பின்னணியில் இருப்பது யார் இவரை இயக்குவது யார்? அரசியல் அழுத்தம் உள்ளதா என்பது குறித்து பல்வேறு கோணங்களில் அவரிடம் கேள்விகள் கேட்கப்பட்டு பதில்கள் பெற்று வருகின்றனர். இந்த விவகாரத்தில் முகமூடி ஆசாமி திடுக்கிடும் தகவல்களை கூறி இருப்பதாக தெரிகிறது இதனால் தர்மஸ்தலா விவகாரத்தில் அடுத்தடுத்து புதிய திருப்பங்கள் ஏற்பட்டு வருகிறது. இதற்கிடையே முகமூடி நபரின் முதல் மனைவி நிருபர்களிடம் கூறும் போது அவர் ஒரு பெரிய மகா பொய்யன் வாயைத் திறந்தால் போய் தன் பேசுவார் அவரை விட்டு நான் பிரிந்து விட்டேன் என்று கூறி இருக்கிறார் தர்மஸ்தலாவில் நுாற்றுக்கணக்கான பெண் சடலங்கள் புதைக்கப்பட்டதாக பொய் புகார் அளித்தவரை எஸ்.ஐ.டி., எனும் சிறப்பு புலனாய்வு குழுவினர் கைது செய்தனர். அவரிடம் 10 நாட்கள் காவலில் வைத்து விசாரிக்க எஸ்.ஐ.டி.,க்கு, பெல்தங்கடி நீதிமன்றம் அனுமதி அளித்துள்ளது. தட்சிண கன்னடா மாவட்டம், பெல்தங்கடி மாவட்டத்துக்கு முகமூடி அணிந்த நபர், தன் வக்கீல்களுடன், கடந்த ஜூலை 3ம் தேதி நீதிமன்றத்திற்கு சென்று, பிரிவு 164ன் கீழ், நீதிபதி முன்னிலையில் பரபரப்பு வாக்குமூலம் அளித்தார். அதில், ‘தர்மஸ்தலா கோவிலில் 1995 – 2012 வரை நான் பணியாற்றிய காலகட்டத்தில், பலாத்காரம் செய்து கொல்லப்பட்ட நுாற்றுக்கும் மேற்பட்ட பெண்களின் உடல்களை, என் மேற்பார்வையாளர் உத்தரவின்படி நேத்ராவதி ஆற்றங்கரையில் புதைத்தேன். புதைக்கப்பட்ட பெண்கள், என் கனவில் தோன்றியதால் மனசாட்சி உறுத்தியது. தற்போது உண்மையை சொல்ல வந்துள்ளேன்’ எனக் கூறி, சில எலும்பு கூடுகள், மண்டை ஓடுகளையும் நீதிமன்றத்தில் சமர்ப்பித்தார். இது கர்நாடகாவை மட்டுமின்றி, தேசிய அளவில் அதிர்ச்சியை ஏற்படுத்தியது. இது தொடர்பாக, பெல்தங்கடி போலீஸ் நிலையத்தில் வழக்குப் பதிவானது. உச்ச நீதிமன்ற முன்னாள் நீதிபதி கோபால கவுடா உட்பட சிலரின் அழுத்தத்தால், இவ்விவகாரம் குறித்து விசாரிக்க கர்நாடக அரசு எஸ்.ஐ.டி., அமைத்தது. உள்நாட்டு பாதுகாப்பு பிரிவு டி.ஜி.பி., பிரணவ் மொஹந்தி தலைமையில் 20 பேர் கொண்ட அதிகாரிகள் நியமிக்கப்பட்டனர். தர்மஸ்தலா மஞ்சுநாதா கோவிலுக்கு செல்லும் வழியில் உள்ள நேத்ராவதி ஆற்றின் கரையோரம், புகார்தாரர் அடையாளம் காட்டிய இடங்களில் தோண்டப்பட்டன. 17 இடங்களில் தோண்டியபோது இரண்டு இடங்களில் மட்டுமே எலும்புக்கூடுகள் சிக்கின. இவை, ஆய்வகத்துக்கு அனுப்பி வைக்கப்பட்டுள்ளன. உண்மை இதற்கிடையில், எதிர்க்கட்சியான பா.ஜ.,வினர், அரசை கேள்விகளால் துளைத்தெடுத்தனர். இதனால் விழிப்பிதுங்கிய அரசு, புகார்தாரரிடம் தீவிர விசாரணை நடத்தும்படி எஸ்.ஐ.டி.,க்கு உத்தரவிட்டது. இதையடுத்து அவரிடம் எஸ்.ஐ.டி., அதிகாரிகள் தீவிர விசாரணை நடத்தினர். அப்போது அவர், ‘தர்மஸ்தலா கோவிலில் செய்து வந்த வேலையிலிருந்து விலகி, தமிழகத்துக்கு சென்றுவிட்டேன். 2023 டிசம்பரில் சிலர் என்னை சந்தித்தனர். ‘தர்மஸ்தலா கோவில் அருகில், சட்ட விரோதமாக கொலை செய்யப்பட்ட பெண்களின் உடல்களை புதைத்ததாக, போலீசில் தெரிவிக்க வேண்டும்’ என அழுத்தம் கொடுத்தனர். நீதிமன்றத்தில் சமர்ப்பித்த மண்டை ஓடுகளும், அவர்கள் கொடுத்தது தான்’ என கூறி, அதிர்ச்சி அளித்தார் என்பது குறிப்பிடத்தக்கது
