மலேசியா, நவ. 22-விஜய் நடிக்கும் கடைசி படமான ‘ஜனநாயகன்’ இசை வெளியீட்டு விழா மலேசியாவில் வரும் டிச. 27 அன்று நடைபெற உள்ளது. கே.வி.என் நிறுவனம் தயாரிப்பில் உருவாகி வரும் படம் ‘ஜனநாயகன்’. விஜய், பூஜா ஹெக்டே, பாபி தியோல், கெளதம் மேனன், ப்ரியாமணி, நரேன், மமிதா பைஜு உள்ளிட்ட பலர் நடித்துள்ள இப்படத்தினை ஹெச்.வினோத் இயக்கியுள்ளார். இப்படம் பொங்கல் பண்டிகையை முன்னிட்டு வரும் ஜனவரி 9 அன்று வெளியாகும் என்று அறிவிக்கப்பட்டுள்ளது. இப்படத்துக்கு அனிருத் இசையமைத்துள்ளார். இப்படத்தின் இசை வெளியீட்டு விழா எப்போது என்பது குறித்து ரசிகர்கள் தொடர்ந்து கேள்வி எழுப்பி வந்தனர். இது விஜய்யின் கடைசி படம் என்பதால் இந்த இசை வெளியீட்டு விழாவை படக்குழு பிரம்மாண்டமாக நடத்த திட்டமிட்டிருந்தது. வழக்கமாக விஜய் படங்களின் இசை வெளியீட்டு விழாக்கள் சென்னையில் மட்டுமே நடைபெற்று வந்தன. முதல் முறையாக ‘ஜனநாயகன்’ படத்தின் இசை வெளியீட்டு விழாவை மலேசியாவில் வரும் டிசம்பர் 27 அன்று நடத்த படக்குழு திட்டமிட்டுள்ளது.
