சென்னை: ஜனவரி 27-
தங்கத்தின் விலை இதுவரை இல்லாத வகையில் ஒரு அவுன்ஸ் (28.34 கிராம்) தங்கம் 5,000 டாலர்களைக் கடந்து (10 கிராம் ரூ.1.58 லட்சம்) புதிய வரலாற்று உச்சத்தை எட்டியுள்ளது.
உலோகங்களின் வர்த்தக வரலாற்றில் இது ஒரு முக்கிய மைல்கல்லாக பார்க்கப்படு கிறது. தங்கத்தை தொடர்ந்து வெள்ளியின் விலையும் போட்டி போட்டு அவுன்ஸ் ஒன்றுக்கு 105 டாலராக உயர்ந்துள்ளது.
உலகளவில் காணப்படும் நிச்சயமற்ற சூழலால் முதலீட்டாளர்கள் ஏனைய முதலீடுகளை விட தங்கம் மற்றும் வெள்ளியில் முதலீடு செய்வதை பாதுகாப்பானதாக கருதுகின்றனர். அதன் விளைவாக, முன்னணி தொழில்நுட்ப நிறுவனங்களின் சந்தை மதிப்புக்கு நிகராக தங்கம் மற்றும் வெள்ளியின் சந்தை மதிப்பும் உயர்ந்து வருகிறது.
நேற்றைய நிலவரப்படி, சர்வதேச சந்தையில் ஒரு அவுன்ஸ் தங்கம் 5,092.71 டாலர் என்ற வரலாற்றுச் சாதனை அளவில் விற்பனையானது.
அமெரிக்க அதிபர் டொனால்டு ட்ரம்பின் அதிரடி வர்த்தகக் கொள்கைகள் சந்தையை நிலைகுலையச் செய்துள்ளன. குறிப்பாக, சீனாவுடன் ஒப்பந்தம் மேற்கொண் டால் கனடா மீது 100% வரி விதிக்கப்படும் என்ற ட்ரம்பின் எச்சரிக்கை முதலீட்டாளர்களை தங்கத்தின் பக்கம் திருப்பியுள்ளது. கிரீன்லாந்து விவகாரத்தில் அமெரிக்கா மற்றும் நேட்டோ அமைப்புகளுக்கு இடையே ஏற்பட்டுள்ள மோதல் போக்கு நிதிச் சந்தையில் பெரும் பாதிப்பை ஏற்படுத்தியுள்ளது.
மேலும், உக்ரைன் மற்றும் காசா போர்கள், வெனிசுலா அதிபர் மதுரோவுக்கு எதிராக அமெரிக்கா எடுத்துள்ள நடவடிக்கைகள் போன்றவை தங்கம். வெள்ளி விலை உயர்வுக்கு வித்திட்டுள்ளன.
உயர்ந்து வரும் பண வீக்கம், அமெரிக்க டாலர் மதிப்பு வீழ்ச்சி. உலக நாடுகளின் மத்திய வங்கிகள் அதிக அளவில் தங்கத்தை வாங்கி குவிப்பது மற்றும் அமெரிக்க ஃபெடரல் ரிசர்வ் வட்டி விகிதத்தைக் மேலும் குறைக்கலாம் என்ற எதிர்பார்ப்பு ஆகியவையும் தங்கம், வெள்ளி விலையேற்றத்துக்கு முக்கிய காரணங்களாக உள்ளன.
விலை மேலும் உயருமா?: தங்கத்தின் விலை வரும் நாட்களில் மேலும் உயரவே வாய்ப்புள்ளதாகப் பொருளாதார வல்லுநர்கள் கணித்துள்ளனர்.
கோல்ட்மேன் சாக்ஸ் நிறுவனம், 2026-ம் ஆண்டின் இறுதியில் ஒரு அவுன்ஸ் தங்கம் 5,400 டாலர்களைத் தாண்டும் என கணித்துள்ளது.
பேங்க் ஆஃப் அமெரிக்கா ஒரு படி மேலே சென்று, 2026-ல் ஒரு அவுன்ஸ் தங்கம் விலை 6,000 டாலர்களை தாண்ட வாய்ப்புள்ளதாகத் தெரிவித்துள்ளது. ஜே.பி.மார்கன் நிறுவனமும் தங்கம் 6,000 டாலர்களைத் தொடும் என தெரிவித்துள்ளது.
