திருச்செந்தூர் முருகன் கோவிலில் வசந்த விழா ஏப்ரல் 14 ல் துவக்கம்

தூத்துக்குடி, ஏப். 8: திருச்செந்தூர் முருகன் கோவிலில் சித்திரை மாத வசந்த விழா வரும் ஏப்ரல் 14ஆம் தேதி தொடங்கி 23ஆம் தேதி வரை 10 நாட்கள் நடைபெற உள்ளது.
முருகனின் ஆறுபடை வீடுகளில் ஒன்றான திருச்செந்தூர் சுப்பிரமணிய சுவாமி திருக்கோவிலுக்கு தினந்தோறும் ஏராளமான பக்தர்கள் வந்து செல்கின்றனர்.
முருகனுக்கு உகந்த நாட்களில் லட்சக்கணக்கான பக்தர்கள் சாமி தரிசனம் செய்வது வழக்கம். இதில் இந்த ஆண்டு சித்திரை வசந்த திருவிழா வருகின்ற 14ஆம் தேதி தொடங்கி 23ஆம் தேதி வரை சுமார் 10 நாட்கள் நடைபெற உள்ளது.
இந்த வசந்த விழா நாட்களில் கோவில் நடை வழக்கம் போலவே அதிகாலை 4 மணி அளவில் திறக்கப்படும்,4.30 மணிக்கு விஸ்வரூப தரிசனம், 5 மணிக்கு உதய மார்த்தாண்ட அபிஷேகம் மற்றும் கால பூஜைகள் நடத்தப்படுகின்றது. வழக்கம்போல மதியம் உச்சிக்கால பூஜையைத் தொடர்ந்து சுவாமி ஜெயந்திநாதர் வள்ளி தெய்வானையுடன் தங்கச் சப்பரத்தில் எழுந்தருளி ராஜகோபுரம் வாசல் எதிரே உள்ள வசந்த மண்டபத்தில் எழுந்தருளி பக்தர்களுக்கு அருள்பாளிப்பார்.
மாலை சாய்ரட்சை தீபாராதனை காண்பிக்கப்பட்டு வசந்த மண்டபத்தில் உள்ள சுவாமி ஜெயந்தி நாதருக்கு சிறப்பு அபிஷேகமும் அலங்காரமும் நடைபெறும், தங்க சப்பரத்தில் எழுந்தருளி மேளதாளம் முழங்க பக்தர்களுக்கு கப்பல் பாடல் பாடி சுவாமி எழுந்தருளியுள்ள வசந்த மண்டபத்தை 11 முறை வலம் வந்து தீபாரதனை காண்பிக்கப்படும்.
சுவாமி தங்கத்தேரில் எழுந்தருளி பக்தர்களுக்கு அருள் பாலித்து கோவில் வந்தடைவார். வசந்த விழாவிற்கான ஏற்பாடுகளை அறங்காவலர் குழு தலைவர் அருள் முருகன், இணை ஆணையர் கார்த்திக், அறங்காவலர்கள் அனிதா குமரன்,செந்தில் முருகன், ராமதாஸ், கணேசன் மற்றும் கோவில் பணியாளர்கள் என அனைவரும் செய்து வருகின்றனர்