ஈரோடு: நவ. 3-
தமிழ்நாடு அரசின் மக்கள் நலத்திட்டங்கள் மற்றும் வளர்ச்சித் திட்டங்களை மக்களின் பயன்பாட்டுக்கு வழங்கி வரும் முதல்-அமைச்சர் விஜய், மாவட்டந்தோறும் சென்று நலத்திட்ட உதவிகளை வழங்குவதுடன், ‘ரோடு ஷோ’ மூலம் பொதுமக்களையும் சந்தித்து வருகிறார்.
இதன் ஒரு பகுதியாக, ஈரோடு மாவட்டத்தில் மகளிர் சுய உதவிக்குழுவினருக்கு தொழில் தொடங்குவதற்கான வங்கிக் கடன் வழங்கும் அரசு விழா பெருந்துறை 4 வழிச்சாலை, காஞ்சிக்கோவில் சாலையில் உள்ள ஸ்ரீலட்சுமி நாராயணா மகாலில் நடைபெறுகிறது. இதில் முதல்-அமைச்சர் விஜய் கலந்து கொண்டு, மகளிர் சுய உதவிக்குழு பெண்களுக்கு வங்கிக் கடன் மற்றும் நலத்திட்ட உதவிகளை வழங்குகிறார். மகளிர் குழுவினர் அமைத்துள்ள கண்காட்சி அரங்கையும் அவர் பார்வையிடுகிறார்.
இதற்காக சென்னையில் இருந்து தனி விமானத்தில் புறப்பட்ட முதல்-அமைச்சர் விஜய், கோவை விமான நிலையம் வந்தார். அங்கு அவரை அமைச்சர்கள் செங்கோட்டையன், அருண்ராஜ் ஆகியோர் வரவேற்றனர். பின்னர் சாலை மார்க்கமாக காரில் ஈரோடு புறப்பட்டார்.
விஜயமங்கலத்தைத் தாண்டியதும் சிப்காட் பகுதி வழியாக அவர் ரோடு ஷோ சென்றார். சாலையின் இருபுறமும் திரண்டிருந்த பொதுமக்களும், த.வெ.க.வினரும் விஜய்க்கு மலர்தூவி உற்சாக வரவேற்பு அளித்தனர். பெண்கள் உள்ளிட்ட பலர் ஆரவாரம் செய்தனர். அவர்களை நோக்கி கையசைத்தபடி விஜய் சென்றார். விஜயமங்கலம் சுங்கச்சாவடியிலும் தொண்டர்களும் பொதுமக்களும் மலர்களைத் தூவியும் முழக்கங்களை எழுப்பியும் வரவேற்றனர்.
பெருந்துறை செல்லும் வழியில் பெருமாநல்லூரில் அத்திக்கடவு–அவினாசி திட்டப் போராட்டக் குழுவினர் விஜயை சந்தித்துப் பேசினர். விவசாயிகள் அவருக்கு வெற்றிலை மாலை அணிவித்தனர். திட்டத்தில் முறையாக ஆய்வு செய்யப்படவில்லை என்றும், 1,400 குட்டைகள் விடுபட்டுள்ளதாகவும் அவர்கள் புகார் அளித்தனர். மேலும், 1,400 குளம், குட்டைகள் அருகே 1,200 அடிக்கு கீழ் நிலத்தடி நீர்மட்டம் இருப்பதாகவும், இரண்டாம் கட்டப் பணிகளை உடனடியாகத் தொடங்க வேண்டும் என்றும் கோரிக்கை வைத்தனர்.
