மைசூர் ஜூன் 6-
மைசூர் மாவட்டம் எச்.டி.கோட்டே தாலுகா பள்ளே கிராமத்தைச் சேர்ந்தவர் உபேந்திரா. பழங்குடியின வாலிபரான இவர், இன்று தனது கிராமத்தைச் சேர்ந்த சிலருடன் சேர்ந்து அருகில் உள்ள காட்டுப் பகுதிக்குச் சென்றார். அங்கிருக்கும் சிறு காட்டு விளைபொருட்களைச் சேகரிக்கும் பணியில் அவர்கள் தீவிரமாக ஈடுபட்டிருந்தனர்.
அப்போது, அடர்ந்த புதர் மறைவிலிருந்து திடீரென வெளிப்பட்ட ஒரு கரடி, இவர்களின் மீது பாய்ந்து பயங்கர தாக்குதல் நடத்தியது. எதிர்பாராத இந்தச் சம்பவத்தால் அதிர்ச்சியடைந்த மற்றவர்கள் அலறியடித்துக்கொண்டு நாலாபுறமும் சிதறி ஓடினர்.
துரதிர்ஷ்டவசமாக, கரடியிடம் உபேந்திரா தனியாக மாட்டிக்கொண்டார். அவரை கரடி கொடூரமாகக் கடித்தும், நகங்களால் கீறியும் குதறியது. இதில் அவருக்கு உடலெங்கும் பலத்த காயம் ஏற்பட்டு, ரத்த வெள்ளத்தில் சரிந்தார்.
அவரது அலறல் சத்தம் கேட்டு, ஓடிய மற்ற பழங்குடியினர் ஒன்று திரண்டு சத்தம்போட்டு கரடியை நோக்கி கற்களை வீசினர். இதையடுத்து கரடி அடர்ந்த காட்டுக்குள் ஓடிமறைந்தது.
ரத்த வெள்ளத்தில் உயிருக்குப் போராடிக்கொண்டிருந்த உபேந்திராவை மீட்ட கிராம மக்கள், உடனடியாக அவரை சிகிச்சைக்காக அருகில் உள்ள அரசு ஆஸ்பத்திரியில் அனுமதித்தனர். அங்கு அவருக்கு தீவிர சிகிச்சை அளிக்கப்பட்டு வருகிறது. தற்போது அவரது நிலைமை கவலைக்கிடமாக இருப்பதாக ஆஸ்பத்திரி வட்டாரங்கள் தெரிவித்துள்ளன.
இதுபற்றி தகவல் அறிந்த வனத்துறை அதிகாரிகள் சம்பவ இடத்திற்கு நேரில் சென்று விசாரணை நடத்தி வருகின்றனர். இச்சம்பவம் அந்தப் பகுதியில் பெரும் பரபரப்பையும், அச்சத்தையும் ஏற்படுத்தியுள்ளது.
