புதுடெல்லி: ஜூன் 2-
தமிழக பாஜகவின் முன்னாள் தலைவர் கே. அண்ணாமலை, இன்று டெல்லியில் பாஜக தேசியத் தலைவர் நிதின் நபின் மற்றும் தேசிய பொதுச் செயலாளர் பி.எல். சந்தோஷ் ஆகியோரை நேரில் சந்தித்துப் பேசினார்.
தமிழக சட்டமன்றத் தேர்தல் முடிவுகளுக்குப் பிறகு, அண்ணாமலை தனது அரசியல் பாதையை மாற்றப்போவதாகவும், பாஜகவிலிருந்து விலகி புதிய அரசியல் கட்சி அல்லது அமைப்பைத் தொடங்கத் திட்டமிட்டுள்ளதாகவும் பரவி வரும் அரசியல் யூகங்களுக்கு மத்தியில் இந்தச் சந்திப்பு நிகழ்ந்துள்ளது.
அண்ணாமலை பாஜகவிலிருந்து விலக முடிவெடுத்துள்ளதாகவும், கடந்த 6 ஆண்டு கால அரசியல் பயண வாய்ப்புகளுக்கு நன்றி தெரிவிக்கும் விதமாகவே இந்தச் சந்திப்பு அமைந்தது என்றும் கட்சி வட்டாரங்கள் தெரிவிக்கின்றன.
தமிழகத்தில் அதிமுகவுடன் கூட்டணி வைப்பதில் அண்ணாமலைக்கும் கட்சியின் தேசிய தலைமைக்கும் இடையே நீண்ட நாட்களாகக் கருத்து வேறுபாடு நிலவி வந்ததாகக் கூறப்படுகிறது. அவர் தனித்துப் போட்டியிட்டு கட்சியின் அடிமட்ட கட்டமைப்பை வலுப்படுத்த விரும்பியதாகத் தெரிகிறது.
தனது அடுத்தகட்ட நடவடிக்கை மற்றும் வதந்திகள் குறித்து செய்தியாளர்கள் கேட்டதற்கு, தயவுசெய்து காத்திருங்கள், இன்னும் இரண்டு நாட்களில் நாம் விரிவாக அமர்ந்து பேசுவோம் என்று அண்ணாமலை பதிலளித்துள்ளார்.
அண்ணாமலையின் பிறந்தநாளான ஜூன் 4-க்கு முன்னதாக, அவரது ஆதரவாளர்கள் கோயம்புத்தூரில் “எங்கள் தலைவரே, வாருங்கள் வழிநடத்துங்கள்” போன்ற வாசகங்கள் அடங்கிய போஸ்டர்களை ஒட்டியுள்ளதால், தமிழக அரசியலில் பெரும் பரபரப்பு ஏற்பட்டுள்ளது.
