நகோயா: அக். 1-
2026 ஆசிய விளையாட்டுப் போட்டியின் பாய்மரப் படகுப் போட்டியில் இந்தியா தனது முதல் பதக்கத்தை வென்றது. ஆடவர் ஸ்கிஃப் பிரிவில் இந்தியாவின் பிரின்ஸ் குரிசிங்கல் நோபல், மனு பிரான்சிஸ் ஆகியோர் இணைந்து வெள்ளிப் பதக்கம் வென்று சாதனை படைத்தனர். இந்த வெற்றியின் மூலம், ஆசிய விளையாட்டுப் போட்டியில் பாய்மரப் படகுப் பிரிவில் இந்தியாவுக்கான முதல் பதக்கம் கிடைத்துள்ளது.
கடந்த சில நாட்களாக நடைபெற்ற மொத்தம் 9 பந்தயங்களின் முடிவில் இந்திய ஜோடி சீரான செயல்பாட்டை வெளிப்படுத்தியது. போட்டியின் ஒரு பந்தயத்தில் முதலிடத்தையும் அவர்கள் பிடித்தனர். இருப்பினும், பதக்கத்தைத் தீர்மானிக்கும் கடைசி பந்தயத்துக்கு முன்பாக இந்திய ஜோடி கடும் நெருக்கடியை எதிர்கொண்டது. 9-வது மற்றும் கடைசி பந்தயத்தில் பிரின்ஸ் குரிசிங்கல் நோபல், மனு பிரான்சிஸ் ஜோடி அபாரமாகச் செயல்பட்டது. அந்தப் பந்தயத்தில் 2-வது இடத்தைப் பிடித்ததன் மூலம், ஒட்டுமொத்தப் போட்டியில் தங்களின் பதக்க வாய்ப்பை உறுதி செய்தனர். 9 பந்தயங்களின் முடிவில் இந்திய ஜோடி மொத்தம் 23 புள்ளிகளைப் பெற்று 2-வது இடத்தைப் பிடித்தது. இதன் மூலம் அவர்களுக்கு வெள்ளிப் பதக்கம் கிடைத்தது. இந்தப் பிரிவில் சீன அணி தங்கப் பதக்கத்தையும், ஹாங்காங் அணி வெண்கலப் பதக்கத்தையும் கைப்பற்றின. இந்தியாவுக்காக பாய்மரப் படகுப் போட்டியில் முதல் பதக்கத்தை வென்ற பிரின்ஸ் நோபல், மனு பிரான்சிஸ் ஜோடிக்கு வாழ்த்துகள் குவிந்து வருகின்றன. இதனிடையே, ஸ்குவாஷ் மகளிர் அணிக்கும் வெண்கலப் பதக்கம் கிடைத்தது. அரையிறுதியில் ஹாங்காங் அணிக்கு எதிராக இந்திய அணி தோல்வியடைந்தது. அனஹாத் சிங், தன்வி கன்னா, ஜோஷ்னா சின்னப்பா ஆகியோர் இடம்பெற்றிருந்த இந்திய அணி, அரையிறுதியில் தோல்வியடைந்ததைத் தொடர்ந்து வெண்கலப் பதக்கத்தை வென்றது.
