
மணிலா, நவ. 16:
தென்கிழக்கு ஆசிய நாடுகளின் கூட்டமைப்பான ஆசியானில் 11 நாடுகள் உறுப்பினர்களாக உள்ளன. பிராந்திய வர்த்தகம், முதலீடு, பாதுகாப்பு உள்ளிட்ட துறைகளில் ஒத்துழைப்பை மேம்படுத்தும் நோக்கில் இந்த அமைப்பு செயல்பட்டு வருகிறது. இந்தியா, அமெரிக்கா, சீனா, ஜப்பான், ஆஸ்திரேலியா உள்ளிட்ட நாடுகள், ஆசியான் அமைப்புடன் பேச்சுவார்த்தை நடத்தும் நாடுகள் என்ற அந்தஸ்தைப் பெற்றுள்ளன.
இந்த ஆண்டு ஆசியான் அமைப்பின் தலைமைப் பொறுப்பை பிலிப்பைன்ஸ் வகிக்கிறது. இதையடுத்து, அந்த நாட்டின் தலைநகர் மணிலாவில் இன்று (நவம்பர் 16) முதல் 18-ம் தேதி வரை ஆசியான் உச்சி மாநாடு நடைபெறுகிறது. இதில் பங்கேற்பதற்காக பிரதமர் நரேந்திர மோடி இன்று பிலிப்பைன்ஸ் செல்கிறார்.
மாநாட்டையொட்டி, ஆசியான் அமைப்பு நடத்தும் ஆசியான்–இந்தியா மாநாடு மற்றும் ஆசியான்–கிழக்காசிய மாநாடு உள்ளிட்ட நிகழ்ச்சிகளிலும் பிரதமர் மோடி பங்கேற்கிறார். இந்தோ–பசிபிக் கடல் பிராந்தியத்தில் வர்த்தகம் மற்றும் பாதுகாப்பு தொடர்பான விவகாரங்கள் குறித்து அவர் மாநாட்டில் பேசுவார் என எதிர்பார்க்கப்படுகிறது. இதற்கிடையே, இந்தியா, ஆஸ்திரேலியா, அமெரிக்கா மற்றும் ஜப்பான் ஆகிய நாடுகள் இடம்பெற்றுள்ள குவாட் அமைப்பின் மாநாடும் நடைபெற உள்ளது.













