டெட்ராய்ட், செப். 28-
அமெரிக்காவின் மிச்சிகன் மாநிலம், டெட்ராய்ட்டில் வாக்குவாதத்தைத் தொடர்ந்து செயல்பட்டதாகக் கூறப்படும் இரவு நேர ஸ்ட்ரிப் கிளப்பில் ஞாயிற்றுக்கிழமை அதிகாலை நடந்த துப்பாக்கிச்சூட்டில் 3 பேர் உயிரிழந்தனர். மேலும் 4 பேர் காயமடைந்தனர் என்று போலீசார் தெரிவித்தனர். நகரின் மேற்கு பகுதியில் உள்ள ஈட்டன் அவென்யூ–பிரெஸ்ட் ஸ்ட்ரீட் சந்திப்பு அருகே காலை 7.21 மணியளவில் இந்தச் சம்பவம் நடந்தது. துப்பாக்கிச்சூட்டில் பாதிக்கப்பட்ட 7 பேரும் 20 முதல் 30 வயதுக்குட்பட்டவர்கள் என நம்பப்படுகிறது. சம்பவ இடத்துக்கு விரைந்த போலீசார், துப்பாக்கிக் குண்டு காயங்களுடன் 3 ஆண்கள் உயிரிழந்த நிலையில் இருப்பதைக் கண்டனர். காயமடைந்த 2 ஆண்கள், 2 பெண்கள் என 4 பேரும் தனியார் கார்களில் அருகிலுள்ள மருத்துவமனைகளுக்குக் கொண்டு செல்லப்பட்டனர்.இந்தச் சம்பவம் அந்தக் கிளப்பில் ஏற்பட்ட மோதலைத் தொடர்ந்து நடந்ததாக டெட்ராய்ட் காவல் துறைத் தலைவர் டாட் பெட்டிசன் தெரிவித்தார். “சண்டை ஏற்பட்டது; மோதல் நடந்தது. அதன் விளைவாக, சிலர் துப்பாக்கி வன்முறை மூலம் பிரச்சினையைத் தீர்க்க முடிவு செய்தனர்” என்று அவர் கூறினார். சம்பவம் நடந்த இடம் டெட்ராய்ட் காவல் துறைக்கு ஏற்கெனவே தெரிந்த முகவரி என்றும், இந்த ஆண்டில் அந்த முகவரிக்கு 7 முறை அழைப்புகள் வந்துள்ளதாகவும் பெட்டிசன் தெரிவித்தார். “இந்த முகவரி டெட்ராய்ட் காவல் துறைக்கு புதியது அல்ல” என்றும் அவர் கூறினார். அந்த இடம் இரவு நேரத்தில் செயல்படும் ஸ்ட்ரிப் கிளப் எனக் கூறிய பெட்டிசன், போலீசாருக்கு சில தடயங்கள் கிடைத்துள்ளதாகவும், விசாரணை தொடர்பான கூடுதல் விவரங்களை வெளியிட முடியாது என்றும் தெரிவித்தார். துப்பாக்கிச்சூட்டுக்கு வழிவகுத்த காரணம், சந்தேக நபர் குறித்த தகவல் அல்லது அவரது அடையாளம் எதையும் அதிகாரிகள் வெளியிடவில்லை. எனினும், பொதுமக்களுக்கு தற்போதைக்கு அச்சுறுத்தல் இல்லை என்று டெட்ராய்ட் காவல் துறை தெரிவித்தது.
