பெங்களூரு, அக். 23-
பதினைந்து ஆண்டுகள் நிலத்தை மாற்றக் கூடாது (விற்பனை செய்யக் கூடாது) என்ற தடைக்காலம் முடிந்த பிறகு, அரசு ஒதுக்கிய நிலத்தை விற்பனை செய்தால் அதை நிபந்தனை மீறலாகக் கருதி மீண்டும் கைப்பற்ற முடியாது என்று உயர்நீதிமன்றம் முக்கிய தீர்ப்பு வழங்கி உள்ளது. நிலம் ஒதுக்கப்பட்ட 36 ஆண்டுகளுக்குப் பிறகும், விற்பனை செய்யப்பட்ட 13 ஆண்டுகளுக்குப் பிறகும் நில ஒதுக்கீட்டை ரத்து செய்ய முயன்றது சட்டவிரோதமானது என்று நீதிமன்றம் தெளிவுபடுத்தியுள்ளது.
சித்ரதுர்கா மாவட்டம் சள்ளக்கெரே தாலுகாவைச் சேர்ந்த டி. சுனிதா மற்றும் அவரது கணவர் எம்.எஸ். பசவராஜு ஆகியோர் தாக்கல் செய்த மனுவை விசாரித்த நீதிபதி என்.எஸ். சஞ்சய் கவுடா அடங்கிய அமர்வு, வருவாய்த்துறை மற்றும் மாவட்ட ஆட்சியர் நில ஒதுக்கீட்டை ரத்து செய்து பிறப்பித்த உத்தரவுகளை ரத்து செய்துள்ளது.
அரசு நிலத்தை ஒதுக்கும்போது விதித்த 15 ஆண்டுகள் விற்பனைத் தடைக்காலம் முடிந்த பிறகு, அந்த நிலத்தின் மீதான அரசின் நிபந்தனைக்குட்பட்ட உரிமை முடிவுக்கு வருகிறது. அதன் பிறகு நிலத்தைப் பெற்றவர் விதிகளின்படி நிலத்தைப் பயன்படுத்த அல்லது விற்பனை செய்ய சுதந்திரமானவர் என்று நீதிபதி கருத்து தெரிவித்துள்ளார்.
ஒருவேளை நில ஒதுக்கீட்டின் நிபந்தனை மீறப்பட்டிருந்தால், வருவாய்த்துறை உடனடியாக அல்லது நியாயமான காலத்திற்குள் நடவடிக்கை எடுத்திருக்க வேண்டும். ஆனால், பல தசாப்தங்களுக்குப் பிறகு நில ஒதுக்கீட்டை ரத்து செய்ய முயல்வது சட்டவிரோதமானது என்று நீதிமன்றம் கூறியுள்ளது.
கர்நாடக நில ஒதுக்கீடு விதிகள்-1969-ன் விதி 25-ன் படி, தவறான தகவல் அல்லது மோசடி மூலம் நிலம் பெற்றிருந்தால் மட்டுமே நில ஒதுக்கீட்டை ரத்து செய்ய வாய்ப்புள்ளது. இந்த விதியின் கீழ் வாய்ப்பு இல்லாதபோது, மாவட்ட ஆட்சியர் கர்நாடக நில வருவாய் சட்டத்தின் பிரிவு 25-ன் கீழ் தங்களது தன்னிச்சையான அதிகாரத்தைப் பயன்படுத்தி நில ஒதுக்கீட்டை ரத்து செய்ய முடியாது என்று அமர்வு தெளிவுபடுத்தியுள்ளது.
வழக்கின் பின்னணி:
சள்ளக்கெரே தாலுகா சர்வே எண் 277-ல் உள்ள 20 குண்டா நிலத்தை 1984-85-ல் சிறப்பு உதவி ஆணையர் ‘பிரகதி கிராமீண உத்யோக சங்கத்திற்கு’ ஒதுக்கீடு செய்திருந்தார். அப்போது 15 ஆண்டுகள் வரை நிலத்தை விற்பனை செய்யக் கூடாது என்ற நிபந்தனை விதிக்கப்பட்டிருந்தது.
1988-ல் நிலத்தில் கட்டிடம் கட்ட தாசில்தார் கட்டணம் பெற்றுக்கொண்டு அனுமதி அளித்தார். பின்னர், விற்பனைத் தடைக்காலம் முடிந்த பிறகு 2007-ல் அந்தச் சங்கம் எம்.எஸ். பசவராஜு என்பவருக்கு கிரயப் பத்திரத்தின் மூலம் நிலத்தை விற்பனை செய்தது. நகராட்சியிலும் பசவராஜு பெயருக்குக் பட்டா (காதா) மாற்றம் செய்யப்பட்டது.
நில உரிமை:
பின்னர் 2009-ல் பசவராஜு தானப் பத்திரத்தின் மூலம் தனது மனைவி டி. சுனிதாவுக்கு நிலத்தை மாற்றிக் கொடுத்தார்.
ஆனால், உள்ளூர் வாசிகள் அளித்த புகாரின் அடிப்படையில் 2020-ல் வழக்கை விசாரித்த தாசில்தார் மற்றும் சித்ரதுர்கா மாவட்ட ஆட்சியர், நில ஒதுக்கீட்டு நிபந்தனை மீறப்பட்டுள்ளதாகக் கூறி ஒதுக்கீட்டை ரத்து செய்தனர். மேலும், நிலத்தை அரசுக்குக் பறிமுதல் செய்யவும் உத்தரவிட்டனர்.
இந்த உத்தரவுகளை எதிர்த்து சுனிதா மற்றும் பசவராஜு உயர்நீதிமன்றத்தை அணுகினர். மனுவை விசாரித்த நீதிபதி, வருவாய்த்துறையின் முன்மொழியப்பட்ட அறிக்கைகள் மற்றும் மாவட்ட ஆட்சியரின் பறிமுதல் உத்தரவை ரத்து செய்து, மனுதாரர்களின் நில உரிமையை உறுதி செய்துள்ளார்.
