Home மாவட்டங்கள் பெங்களூர் ஆர்.டி.இ. உச்சவரம்பு அதிகரிப்பு நடுத்தர குடும்ப குழந்தைகளுக்கும் தனியார் பள்ளிகளில் இலவச கல்வி

ஆர்.டி.இ. உச்சவரம்பு அதிகரிப்பு நடுத்தர குடும்ப குழந்தைகளுக்கும் தனியார் பள்ளிகளில் இலவச கல்வி

பெங்களூரு, நவ. 19-
கல்வி உரிமைச் சட்டத்தின் (ஆர்.டி.இ.) கீழ் தனியார் பள்ளிகளில் குழந்தைகளைச் சேர்ப்பதற்கான பெற்றோர்களின் ஆண்டு வருமான உச்சவரம்பை ரூ.3.5 லட்சத்தில் இருந்து ரூ.8 லட்சமாக உயர்த்தி கர்நாடக பள்ளிக்கல்வி மற்றும் எழுத்தறிவுத் துறை உத்தரவிட்டுள்ளது.
ரூ.4.5 லட்சம் உயர்வு
அனைத்து குழந்தைகளுக்கும் சமமான, தரமான கல்வி கிடைக்க வேண்டும் என்ற நோக்கில் இந்த முடிவு எடுக்கப்பட்டுள்ளது. ஆர்.டி.இ. சட்டத்தின்படி தனியார் பள்ளிகளில் 25 சதவீத இடங்கள் ஏழை மற்றும் எளிய குடும்பத்து குழந்தைகளுக்கு ஒதுக்கப்பட்டு, இலவசக் கல்வி வழங்கப்படுகிறது.
இதற்கு முன்பு இந்தத் திட்டத்தில் சேர பெற்றோரின் ஆண்டு வருமானம் ரூ.3.5 லட்சத்திற்குள் இருக்க வேண்டும் என்ற விதி இருந்தது. தற்போது அது ரூ.4.5 லட்சம் உயர்த்தப்பட்டு, ரூ.8 லட்சமாக நிர்ணயிக்கப்பட்டுள்ளது. இதனால் ஏழைக் குடும்பங்கள் மட்டுமின்றி, நடுத்தர வர்க்கக் குடும்பங்களின் குழந்தைகளுக்கும் தனியார் பள்ளிகளில் இலவசமாகப் படிக்கும் வாய்ப்பு கிடைத்துள்ளது.
நாட்டிலேயே கர்நாடகா முதலிடம்
ஆர்.டி.இ. திட்டத்திற்கு ஆண்டு வருமான உச்சவரம்பை ரூ.8 லட்சமாக நிர்ணயித்திருப்பது நாட்டிலேயே கர்நாடகாவில்தான் அதிகபட்சம் ஆகும். குஜராத்தில் ரூ.6 லட்சமாகவும், டெல்லியில் ரூ.5 லட்சமாகவும் மட்டுமே இந்த உச்சவரம்பு உள்ளது. கர்நாடக அரசின் இந்த உத்தரவால் மற்ற மாநிலங்களை விட இங்கு அதிக குடும்பங்கள் பயன்பெறும்.
தற்போது தனியார் பள்ளிகளில் கட்டணம், புத்தகம், சீருடை, பஸ் கட்டணம் எனப் பல்வேறு செலவுகள் நடுத்தர குடும்பங்களை வாட்டி வதைக்கின்றன. இந்த சூழ்நிலையில் அரசின் இந்த அறிவிப்பு பெற்றோர்களுக்குப் பெரிய நிம்மதியையும், உதவியையும் கொடுத்துள்ளது.
விண்ணப்பிப்பது அவசியம்
அதே சமயம், வருமான உச்சவரம்பு உயர்த்தப்பட்டதாலேயே அனைவருக்கும் உடனடியாக இடம் கிடைத்துவிடாது. பள்ளிகளில் உள்ள காலியிடங்கள், வசிப்பிட தகுதி மற்றும் சரியான ஆவணங்களுடன் விண்ணப்பிப்பதைப் பொறுத்தே சேர்க்கை அமையும். எனவே பெற்றோர்கள் கல்வித்துறையின் அதிகாரப்பூர்வ அறிவிப்பைக் கவனித்து உரிய நேரத்தில் விண்ணப்பிக்குமாறு கேட்டுக்கொள்ளப்படுகிறார்கள்.

  • புதிய வருமான உச்சவரம்பு: ரூ.8 லட்சம்
  • பழைய உச்சவரம்பு: ரூ.3.5 லட்சம் (ரூ.4.5 லட்சம் உயர்வு)
  • தனியார் பள்ளிகளில் இடஒதுக்கீடு: 25 சதவீதம்
  • மற்ற மாநிலங்கள்: குஜராத் (ரூ.6 லட்சம்), டெல்லி (ரூ.5 லட்சம்)
  • பயன்: ஏழை மற்றும் நடுத்தர குடும்பத்து குழந்தைகளுக்கு தனியார் பள்ளிகளில் இலவசக் கல்வி. என்பது குறிப்பிடத்தக்கது