பெங்களூரு:செப். 13-
கர்நாடக சுற்றுச்சூழல் துறை அமைச்சர் ராமலிங்க ரெட்டி தெரிவித்ததாவது, பெங்களூரு மாநகரின் 50 சதவீத கழிவுநீர் சுத்திகரிக்கப்படாமல் காவிரி, தென்பெண்ணை ஆறுகளில் கலந்து தமிழகத்துக்குச் செல்கிறது.
கர்நாடக மாநிலம் பெங்களூரு மாநகரின் கழிவுநீர் காவிரி, தென்பெண்ணை ஆறுகளில் கலப்பதாக தமிழக அரசு பசுமை தீர்ப்பாயத்தில் வழக்கு தொடர்ந்துள்ளது. இந்த வழக்கு அடுத்த வாரம் விசாரணைக்கு வரவுள்ள நிலையில், கர்நாடக சுற்றுச்சூழல் துறை அமைச்சர் ராமலிங்க ரெட்டி பெங்களூரு வடிகால் வாரிய அதிகாரிகளுடன் நேற்று ஆலோசனை நடத்தினார்.
ஆலோசனைக்குப் பின்னர் செய்தியாளர்களிடம் பேசிய அவர், பெங்களூரு மாநகரில் உள்ள கால்வாய்கள் வாயிலாக தினசரி 2,825 எம்.எல்.டி. கழிவுநீர் வெளியேறுகிறது என்றார். இதில், 1,364.5 எம்.எல்.டி. கழிவுநீர் 37 சுத்திகரிப்பு மையங்கள் மூலம் சுத்திகரிக்கப்படுகிறது.
சுத்திகரிக்கப்பட்ட நீர் பின்னர் கோலார், சிக்கப்பள்ளாப்பூர், துமக்கூரு ஆகிய அண்டை மாவட்டங்களின் விவசாயத் தேவைகளுக்குக் கொண்டு செல்லப்படுகிறது.
மீதமுள்ள 47 சதவீதம், அதாவது சுத்திகரிக்கப்படாத கழிவுநீர், ரிஷபாவதி ஆற்றில் கலந்து, கனகபுரா அருகேயுள்ள சங்கமத்தில் காவிரி ஆற்றுடன் கலக்கிறது. அங்கிருந்து அது தமிழகத்துக்குச் செல்கிறது. அதேபோல், சுத்திகரிக்கப்படாத கழிவுநீர் தென்பெண்ணை ஆற்றிலும் கலந்து தமிழகத்துக்குச் செல்கிறது.
தமிழகத்துக்குச் செல்லும் சுத்திகரிக்கப்படாத கழிவுநீரைச் சுத்திகரிக்க நடவடிக்கை எடுத்து வருகிறோம் என்று அமைச்சர் தெரிவித்தார். இதற்காக 43 சுத்திகரிப்பு மையங்களைப் புதிதாக உருவாக்கத் திட்டமிட்டுள்ளோம். அவற்றின் மூலம் 1,174 எம்.எல்.டி. நீரைச் சுத்திகரிக்க இயலும். பசுமைத் தீர்ப்பாயம் வெளியிட்டுள்ள தர நிர்ணய அளவுகளுக்கு ஏற்ப இந்த சுத்திகரிப்பு மையங்கள் இயங்க நடவடிக்கை எடுக்கப்படும் என்றும் அவர் கூறினார்.
இவ்வாறு அமைச்சர் ராமலிங்க ரெட்டி தெரிவித்தார்.காவிரி, தென்பெண்ணை ஆகிய ஆறுகளில் கர்நாடக அரசு கழிவுநீரைக் கலந்து வருவதாக தமிழக அரசும் விவசாய அமைப்புகளும் நீண்ட காலமாக குற்றம்சாட்டி வந்தன. பெங்களூருவில் உருவாகும் கழிவுநீரில் ஒரு பகுதி சுத்திகரிப்பு மையங்கள் வழியாகச் சுத்திகரிக்கப்படும் நிலையில், மீதிப் பகுதி ஆறுகளின் வழியாக தமிழகத்தை அடைவதாக அமைச்சர் விளக்கினார்
