பெங்களூரு, செப். 26- கர்நாடகத்தில் நடைபெற்று வரும் வாக்காளர் பட்டியலின் சிறப்பு தீவிரத் திருத்தப் பணியின் (எஸ்ஐஆர்) கீழ், செப்டம்பர் 6-ஆம் தேதி முதல் வழங்கப்பட்ட 43.82 லட்சம் நோட்டீஸ்களில் 28.81 லட்சத்துக்கும் மேற்பட்டவற்றின் விசாரணைகள் முடிக்கப்பட்டுள்ளன.
இது 69.2 சதவீதமாகும். இன்னும் 12.82 லட்சம் விசாரணைகள் நிலுவையில் உள்ளன. கடைசி விசாரணை அக்டோபர் 12-ஆம் தேதி நடைபெறும். கோரிக்கைகள் மற்றும் ஆட்சேபனைகளைத் தீர்ப்பதற்கும், நோட்டீஸ் நடவடிக்கையை நிறைவு செய்வதற்கும் அக்டோபர் 22 கடைசி நாளாகும். மாநில தலைமைத் தேர்தல் அதிகாரி (சிஇஓ) வி. அன்புக்குமார் வெள்ளிக்கிழமை வெளியிட்ட சமீபத்திய நிலவர அறிக்கையின்படி, ஜூன் 16 முதல் செப்டம்பர் 24 வரை பெயர் சேர்த்தல், நீக்கம் மற்றும் திருத்தம் தொடர்பாக மொத்தம் 19,48,164 விண்ணப்பங்கள் பெறப்பட்டுள்ளன.
இதில் படிவம் 6 மூலம் 7,70,988, படிவம் 6ஏ மூலம் 4,551, படிவம் 7 மூலம் 61,130, படிவம் 8 மூலம் 11,11,495 விண்ணப்பங்கள் கிடைத்துள்ளன.
தற்போதைய வாக்காளர் பட்டியலில் பெயர் சேர்க்க அல்லது நீக்க முன்மொழியப்பட்டதற்கு ஆட்சேபனை தெரிவிக்க படிவம் 7 பயன்படுத்தப்படுகிறது. பெறப்பட்ட 61,130 படிவம் 7 விண்ணப்பங்களில், பெயர் சேர்ப்புக்கு எதிரான ஆட்சேபனை எதுவும் இல்லை என அறிக்கையில் தெரிவிக்கப்பட்டுள்ளது.
