சவதத்தி எல்லம்மன் கோவில் கடைகளில் அதிகாரிகள் அதிரடி சோதனை

பெலகாவி, செப். 21-
சவதத்தியில் உள்ள வரலாற்றுச் சிறப்புமிக்க எல்லம்மனகுட்டா பகுதியில் உள்ள குங்குமம், பண்டாரம் மற்றும் மளிகைக் கடைகளில் அதிகாரிகள் திடீர் சோதனை நடத்தினர். அங்கு விற்பனை செய்யப்பட்ட குளிர்பானங்கள் மற்றும் உணவுப் பொட்டலங்களில் காலாவதி தேதி (Expiry Date) குறிப்பிடப்படாதது பெரும் அதிர்ச்சியை ஏற்படுத்தியுள்ளது.
ஸ்ரீ ரேணுகா எல்லம்மன் கோவில் வளர்ச்சி அதிகாரசபையின் செயலாளர் பிரபாவதி பகீர்பூர் தலைமையில் இந்த அதிரடி வேட்டை நடத்தப்பட்டது. கடைகளில் விற்பனை செய்யப்படும் பொருட்களின் தரம், காலாவதி தேதி மற்றும் கடைகளின் உரிமம் புதுப்பிக்கப்பட்டுள்ளதா என்பது குறித்து தீவிர ஆய்வு மேற்கொள்ளப்பட்டது.
இதுகுறித்து அதிகாரி பிரபாவதி பகீர்பூர் கூறுகையில், “பல கடைகளில் விற்பனை செய்யப்படும் குளிர்பான பாட்டில்கள் மற்றும் உணவுப் பொட்டலங்களில் காலாவதி தேதி இல்லை. சிலர் உரிமம் இன்றியும், உரிமத்தைப் புதுப்பிக்காமலும் வணிகம் செய்து வருவது கண்டறியப்பட்டுள்ளது.
சில உணவகங்களில் சமையலுக்கு அழுகிய காய்கறிகளைப் பயன்படுத்துகின்றனர். குங்குமக் கடைகள் மற்றும் மளிகைக் கடைகளில் சட்டவிரோதமாக மருந்துப் பொருட்களும் விற்பனை செய்யப்படுகின்றன. விதிமீறலில் ஈடுபடும் கடைகளின் மின்சாரம் மற்றும் குடிநீர் இணைப்பு துண்டிக்கப்படும். தவறு தொடர்ந்தால் கடும் ஒழுங்கு நடவடிக்கை எடுக்கப்படும்” என எச்சரித்தார்.
புகழ்பெற்ற ஆன்மீகத் தலமான எல்லம்மனகுட்டாவிற்கு ஆண்டுதோறும் 1 கோடிக்கும் அதிகமான பக்தர்கள் வருகை தந்து பல்வேறு பொருட்களை வாங்கிச் செல்கின்றனர். இங்கு வரும் பக்தர்களை வியாபாரிகள் யாரும் ஏமாற்றக் கூடாது என்றும் அவர் அறிவுறுத்தினார்.
இந்த ஆய்வின்போது ஸ்ரீ ரேணுகா எல்லம்மன் கோவில் வளர்ச்சி அதிகாரசபையின் பிற அதிகாரிகளும் உடனிருந்தனர்.