
சபரிமலை: நவ. 20-
சபரிமலையில் கோவில் நடை திறக்கப்பட்ட நாள் முதலே பக்தர்கள் கூட்டம் அதிகரித்து வருகிறது. கேரளம் மட்டுமின்றி தமிழ்நாடு, ஆந்திரப் பிரதேசம், தெலுங்கானா, கர்நாடகம் உள்ளிட்ட பல்வேறு மாநிலங்களில் இருந்து ஆயிரக்கணக்கான ஐயப்ப பக்தர்கள் இருமுடி கட்டி வருகின்றனர். இதனால் பம்பை, சன்னிதானம், பதினெட்டாம் படி மற்றும் சுற்றுப்புறப் பகுதிகளில் எங்கு பார்த்தாலும் பக்தர்கள் கூட்டமாகக் காணப்படுகிறது. ‘சுவாமியே சரணம் ஐயப்பா’ என்ற சரண கோஷம் தொடர்ந்து ஒலிக்கிறது.
கூட்ட நெரிசலைத் தவிர்க்க தினமும் ஆன்லைன் முன்பதிவு மூலம் 66 ஆயிரம் பேர், உடனடி முன்பதிவு மூலம் 14 ஆயிரம் பேர் என மொத்தம் 80 ஆயிரம் பக்தர்களுக்கு சாமி தரிசனம் செய்ய அனுமதி வழங்கப்படுகிறது. இருப்பினும், சபரிமலைக்கு 80 ஆயிரத்துக்கும் அதிகமான பக்தர்கள் வருகின்றனர். மண்டல பூஜை காலத்துக்கான ஆன்லைன் முன்பதிவு முடிவடைந்துள்ளதால், உடனடி முன்பதிவு மூலம் தரிசனம் செய்யலாம் என்ற நம்பிக்கையில் பலர் வருகின்றனர். ஆனால் அனுமதிக்கப்பட்ட எண்ணிக்கையிலான பக்தர்களுக்கு மட்டுமே அனுமதி அளிக்கப்படுகிறது.தற்போது நிலக்கல்லில் இருந்து தினமும் 10 ஆயிரம் பேருக்கும், எரிமேலி மற்றும் வண்டிப்பெரியார் சத்திரத்தில் இருந்து தலா 2 ஆயிரம் பேருக்கும் உடனடி முன்பதிவு மூலம் அனுமதி வழங்கப்படுகிறது. பாதுகாப்பு காரணமாக பம்பையில் உடனடி முன்பதிவு மையங்கள் செயல்படவில்லை. இதனால் நிலக்கல், எரிமேலி, வண்டிப்பெரியார் சத்திரம் ஆகிய இடங்களில் பக்தர்கள் மணிக்கணக்கில் காத்திருக்கின்றனர். உடனடி முன்பதிவு எண்ணிக்கையை அதிகரிக்க வேண்டும் என அவர்கள் கோரிக்கை விடுத்துள்ளனர்.கூட்டம் அதிகரித்துள்ளதால், பதினெட்டாம் படி ஏறி தரிசனம் செய்ய பக்தர்கள் 3 முதல் 4 மணி நேரம் வரை காத்திருக்க வேண்டியுள்ளது. நெரிசலைக் கட்டுப்படுத்த, நிமிடத்துக்கு சுமார் 75 பக்தர்கள் பதினெட்டாம் படியில் ஏறும் வகையில் ஏற்பாடு செய்யப்பட்டுள்ளது. போலீசார், கூடுதல் பாதுகாப்புப் படையினர், பேரிடர் மீட்புப் படையினர் பணியில் ஈடுபட்டுள்ளனர்.வரிசையில் நிற்கும் பக்தர்களுக்கு சுக்கு தண்ணீர், குடிநீர், பிஸ்கட் வழங்கப்படுகின்றன. சன்னிதானம், பம்பை, நிலக்கல் மற்றும் பாரம்பரிய வனப்பாதைகளில் 24 மணி நேர மருத்துவ மையங்களும், ஆம்புலன்ஸ் வசதிகளும் தயார் நிலையில் உள்ளன. தேவசம்போர்டு சார்பில் அடிப்படை வசதிகள் செய்யப்பட்டுள்ளன. வார இறுதி மற்றும் விடுமுறை நாட்களில் கூட்டம் மேலும் அதிகரிக்கும் என்பதால், அதற்கான ஏற்பாடுகள் செய்யப்பட்டுள்ளதாக திருவிதாங்கூர் தேவசம் போர்டு தெரிவித்துள்ளது.














