
சென்னை: நவ. 18-
சிறுமிகளைப் பாலியல் வன்கொடுமை செய்ததாகப் பதிவு செய்யப்பட்ட முதல் வழக்கில், தொழிலதிபர் ஜெம் வீரமணி மற்றும் அவரது கார் ஓட்டுநர்களான பாபு, பார்த்திபன் ஆகியோருக்கு எதிராக நவ.20-ம் தேதி குற்றச்சாட்டு பதிவு செய்யப்படும் என சென்னை போக்சோ சிறப்பு நீதிமன்றம் அறிவித்துள்ளது.
சிறுமிகளைப் பாலியல் வன்கொடுமை செய்ததாக ஜெம் வீரமணிக்கு எதிராக இதுவரை 9 வழக்குகள் பதிவு செய்யப்பட்டுள்ளன. இந்த வழக்குகள் தொடர்பாக ஜெம் வீரமணி, சாந்தி, மகேந்திர சிம்மன், வீரமணியின் கார் ஓட்டுநர்களான பாபு, பார்த்திபன், பெருமாள் என்ற பாலா, லாசர், முன்னாள் உதவியாளர் கணேசன் உள்ளிட்ட பலரை போலீஸார் கைது செய்துள்ளனர். இந்த வழக்குகளில் பிரகாஷ் என்பவர் தொடர்ந்து தலைமறைவாக உள்ளார்.
இந்நிலையில், முதல் பாலியல் வழக்கில் குற்றம்சாட்டப்பட்டுள்ள ஜெம் வீரமணி மற்றும் அவரது கார் ஓட்டுநர்களான பாபு, பார்த்திபன் ஆகியோருக்கு எதிராக சிறப்பு புலனாய்வுக் குழு போலீஸார் 720 பக்க குற்றப்பத்திரிகையை சென்னை போக்சோ சிறப்பு நீதிமன்றத்தில் தாக்கல் செய்தனர்.
இந்தக் குற்றப்பத்திரிகையை நீதிமன்றப் பதிவுக்கு எடுத்துக்கொண்ட நீதிபதி எஸ். பத்மா, நீதிமன்றத்தில் நேற்று ஆஜர்படுத்தப்பட்ட மூவருக்கும் குற்றப்பத்திரிகை நகல்களை வழங்க உத்தரவிட்டார். அதன்படி, மூவரும் குற்றப்பத்திரிகை நகல்களைப் பெற்றுக்கொண்டனர்.
இதையடுத்து, வழக்கில் குற்றச்சாட்டுகள் தொடர்பான நடவடிக்கையைத் தொடங்கும் வகையில், நவ.20-ம் தேதி ஜெம் வீரமணி, பாபு, பார்த்திபன் ஆகிய மூவருக்கும் எதிராக குற்றச்சாட்டு பதிவு செய்யப்படும் என நீதிபதி அறிவித்தார்.













