பெங்களூர்: அக். 8-
காக்ரோச் ஜனதா கட்சி (சிஜேபி) அதாவது கரப்பான் பூச்சி கட்சி போராட்டம் தீவிரம் அடைந்துள்ளது டெல்லியைத் தொடர்ந்து, மத்திய தலைமை தேர்தல் ஆணையர் உடனடியாகப் பதவி விலக வலியுறுத்தி பெங்களூரில் இன்று அக்கட்சியினர் பிரம்மாண்ட போராட்டத்தை நடத்தினர்.
பெங்களூரு ஃப்ரீடம் பார்க் (சுதந்திர பூங்கா) வளாகத்தில் ‘ஜனதா நியாயாலயா’ (மக்கள் நீதிமன்றம்) என்ற பெயரில் சிஜேபி தலைமை ஏற்று இந்த பிரம்மாண்ட போராட்டத்தை நடத்தியுள்ளது.
நாட்டில் நடைமுறைப்படுத்தப்பட்டுள்ள எஸ்.ஐ.ஆர் முறையை ரத்து செய்ய வேண்டும். எஸ்.ஐ.ஆர் முறைகேடு குற்றச்சாட்டுக்கு ஆளாகியுள்ள தலைமை தேர்தல் ஆணையர் ஞானேஷ்குமார் தனது பதவியை ராஜினாமா செய்ய வேண்டும் என வலியுறுத்தி சிஜேபி சார்பில் இந்தப் போராட்டம் நடத்தப்பட்டது.
இரண்டு நாட்களுக்கு முன்பாகத்தான் டெல்லியில் பிரம்மாண்ட போராட்டத்தை நடத்திய சிஜேபி, தற்போது பெங்களூரில் போராட்டம் நடத்தியதன் மூலம் நாடு முழுவதும் தலைமை தேர்தல் ஆணையரின் ராஜினாமாவை வலியுறுத்தி போராட்டங்களை நடத்தத் திட்டமிட்டுள்ளது.
சிஜேபி நடத்திய இந்தப் போராட்டத்தில் கட்சியின் நிறுவனர்களான அபிஜித் தீப்கே, சௌரவ் தாஸ், அசந்தோஷ் ராங்கா மற்றும் பிரபல யூடியூபர் துருவ் ரடீ ஆகியோர் கலந்து கொண்டனர்.
‘ஜனதா நியாயாலயா’ பேனரின் கீழ் நடந்த இந்தப் போராட்டத்தில் சிஜேபி தலைவர்களுடன் பிரபல திரைப்பட நடிகர் பிரகாஷ் ராஜ், தேவநூரு மகாதேவா, பிரபல பொருளாதார நிபுணர் பரகாலா பிரபாகர் மற்றும் சில ஓய்வுபெற்ற நீதிபதிகளும் பங்கேற்றனர்.
போராட்டத்தின் போது எஸ்.ஐ.ஆர் முறையால் பாதிக்கப்பட்டவர்களின் குறைகளைக் கேட்டு அறியும் மேடையும் அமைக்கப்பட்டு, அவர்களின் புகார்களைக் கேட்டுத் தீர்ப்பு அளிக்கும் நிகழ்ச்சியும் நடைபெற்று அனைவரின் கவனத்தையும் ஈர்த்தது.
பலத்த போலீஸ் பாதுகாப்பு:
சிஜேபி கட்சியின் போராட்டம் காரணமாக ஃப்ரீடம் பார்க் சுற்றிலும் போலீசார் பலத்த பாதுகாப்பு ஏற்பாடுகளைச் செய்துள்ளனர்.
ஃப்ரீடம் பார்க்கில் சிஜேபி நடத்திய இந்தப் போராட்டத்தில் நூற்றுக்கணக்கான இளைஞர்கள் கலந்து கொண்டதால், அசம்பாவித சம்பவங்கள் எதுவும் நடக்காமல் இருக்க தீவிர கண்காணிப்பில் ஈடுபட்டனர்.
பதவி விலகக் கோரிக்கை:
சிஜேபி கட்சியின் போராட்டத்தில் கலந்து கொண்டு பேசிய தலைவர்கள், “தலைமை தேர்தல் ஆணையர் ஞானேஷ்குமார் பதவி விலக வேண்டும் மற்றும் எஸ்.ஐ.ஆர் திட்டத்தை ரத்து செய்ய வேண்டும். அதுவரை எங்கள் போராட்டம் தொடரும்” என்று கூறினர்.
”ஏற்கனவே டெல்லியில் போராட்டம் நடத்தி முடித்துவிட்டோம். இன்று பெங்களூரில் போராட்டம் நடந்துள்ளது. அடுத்து நாட்டின் பல்வேறு இடங்களிலும் சிஜேபி போராட்டங்களை நடத்தும். தலைமை தேர்தல் ஆணையர் ராஜினாமா செய்யும் வரை இந்த போராட்டம் ஓயாது” என்றும் அவர்கள் செய்தனர்.
