புதுடெல்லி, செப். 17- யுபிஐ பரிவர்த்தனைகளுக்கு விதிக்கப்படும் கட்டணத்தை உடனடியாகத் திரும்பப் பெற வேண்டும் என்று பிரதமர் நரேந்திர மோடிக்கு மக்களவை எதிர்க்கட்சித் தலைவர் ராகுல் காந்தி வேண்டுகோள் விடுத்துள்ளார். இது தொடர்பாக அவர் தனது எக்ஸ் தளத்தில் நேற்று வெளியிட்ட வீடியோ பதிவில், யுபிஐ பரிவர்த்தனைக் கட்டணம் குறித்து தனது எதிர்ப்பைத் தெரிவித்துள்ளார். அந்த வீடியோ பதிவில் ராகுல் காந்தி கூறியதாவது: முன்னாள் பிரதமர் இந்திரா காந்தியிடம் ஒருமுறை, “நீங்கள் இடதுசாரி கொள்கை கொண்டவரா அல்லது வலதுசாரி கொள்கை கொண்டவரா?” என்று கேட்கப்பட்டது. அதற்கு அவர், “நான் இடதுபுறமோ அல்லது வலதுபுறமோ சாய்வதில்லை. நான் நேராக நிற்கிறேன்” என்று பதிலளித்தார். இந்திரா காந்தியின் அந்த நிலைப்பாட்டை மேற்கோள் காட்டிய ராகுல் காந்தி, பிரதமர் நரேந்திர மோடியின் அணுகுமுறை முற்றிலும் மாறுபட்டதாக இருப்பதாகத் தெரிவித்தார். பிரதமர் மோடி இடதுசாரியும் அல்ல, வலதுசாரியும் அல்ல என்று குறிப்பிட்ட அவர், அமெரிக்க அதிபர் டொனால்டு ட்ரம்ப் முன் மண்டியிட முடிவு செய்துள்ளதாக விமர்சித்தார்.யுபிஐ பரிவர்த்தனைக்கு கட்டணம் விதிப்பதன் மூலமும், அமெரிக்காவுக்குப் பெருந்தொகையை வழங்குவதன் மூலமும், பிரதமர் நரேந்திர மோடி ஒவ்வொரு இந்தியர் மீதும் வரியைச் சுமத்தியுள்ளதாக ராகுல் காந்தி குற்றஞ்சாட்டினார். யுபிஐ பரிவர்த்தனைகளுக்கான கட்டணம் இந்திய மக்களிடம் சுமத்தப்படும் வரியாக இருப்பதாகவும் அவர் தனது கருத்தில் குறிப்பிட்டார். மேலும், “பிரதமர் மோடிஜி… இப்போதே யுபிஐ பரிவர்த்தனைக் கட்டணத்தைத் திரும்பப் பெறுங்கள்” என்று ராகுல் காந்தி வலியுறுத்தினார். யுபிஐ பரிவர்த்தனைக்கான கட்டணத்தைத் தொடர்ந்து வசூலிக்கக் கூடாது என்றும், அந்தக் கட்டணத்தை உடனடியாக ரத்து செய்து திரும்பப் பெற வேண்டும் என்றும் அவர் பிரதமரிடம் வேண்டுகோள் விடுத்தார்.அமெரிக்காவிடம் சரண் அடைவதைப் பிரதமர் மோடி இப்போதே நிறுத்திவிட வேண்டும் என்றும் ராகுல் காந்தி தெரிவித்தார். ஒவ்வொரு இந்தியர் மீதும் வரியைச் சுமத்தும் நடவடிக்கைகள் நிறுத்தப்பட வேண்டும் என்றும், அமெரிக்காவுக்குப் பெருந்தொகையை வழங்கும் அணுகுமுறையைக் கைவிட வேண்டும் என்றும் அவர் வலியுறுத்தினார். இவ்வாறு ராகுல் காந்தி தனது எக்ஸ் தள வீடியோ பதிவில் கூறியுள்ளார்.
