புதுதில்லி, அக். 5-
ஃப்ளைதுபாய் விமானத்தின் துணை விமானி ஹம்மாம் அல்-ஹம்மானி, விமானத்தின் கேப்டன் ஸ்மித் மச்சாரை கொலை செய்து, விமானத்தை கடத்தி, டெல் அவிவ் நகரில் உள்ள உயரமான கட்டிடத்தில் மோதி 9/11 பாணியில் தாக்குதல் நடத்தத் திட்டமிட்டிருந்ததாக விசாரணை அதிகாரிகள் தெரிவித்துள்ளனர். இஸ்ரேலின் ஆரம்பகட்ட விசாரணையின்படி, 29 வயதான ஓமன் நாட்டைச் சேர்ந்த அல்-ஹம்மானி இந்தத் தாக்குதலை தனியாகத் திட்டமிட்டதாக சிபிஎஸ் செய்தி நிறுவனம் தெரிவித்துள்ளது. செப்டம்பர் 30-ஆம் தேதி டெல் அவிவ் நோக்கிச் சென்ற விமானத்தில், கேப்டன் மச்சாரை ரகசியமாகக் கொன்று, விமானத்தின் என்ஜின்களை நிறுத்திவிட்டு, டெல் அவிவில் உள்ள கட்டிடத்திலோ அல்லது பென் குரியான் விமான நிலையம் அருகே நிறுத்தப்பட்டிருந்த மற்றொரு விமானத்திலோ மோதச் செய்வது அவரது திட்டமாக இருந்ததாக இத்தாலிய நாளிதழ் ‘கொரியேரே டெல்லா செரா’ செய்தி வெளியிட்டுள்ளது. கேப்டனை அகற்றிய பிறகு, விமானத்தை வழக்கம்போல் இயக்குவது போல நடித்து, தரையிறங்க அனுமதி பெற்று, பின்னர் தாக்குதல் நடத்தத் திட்டமிட்டதாக அல்-ஹம்மானி விசாரணையில் தெரிவித்ததாக இஸ்ரேலிய ஊடகங்கள் கூறியுள்ளன. ஜோர்டான் வான்வெளிக்கு மேல் விமானம் சென்றபோது கட்டுப்பாட்டைக் கைப்பற்ற அவர் திட்டமிட்டிருந்ததாகவும், எச்சரிக்கை எழாமல் இருக்கவே இவ்வாறு திட்டமிட்டதாகவும் கூறப்படுகிறது. ஜூலையிலேயே தாக்குதல் நடத்த நினைத்த அவர், விமானக் குழுவில் ஒருவருடன் நட்பு இருந்ததால் கடைசி நேரத்தில் திட்டத்தை கைவிட்டதாகவும் தெரிவிக்கப்பட்டுள்ளது. செப்டம்பர் 30-ஆம் தேதி காக்பிட்டில் கேப்டன் மச்சாரை கோடாரியால் தாக்கி, விமானத்தைக் கைப்பற்ற அல்-ஹம்மானி முயன்றார். அப்போது 174 பயணிகளுடன் சென்ற போயிங் 737 மேக்ஸ் 8 விமானம், சுமார் 36,000 அடி உயரத்திலிருந்து இரண்டு நிமிடங்களில் கிட்டத்தட்ட 17,000 அடிக்கு தாழ்ந்தது. இதில் விமானத்தின் சுக்கான் பகுதி சேதமடைந்தது. காயமடைந்த நிலையிலும் கேப்டன் மச்சார் காக்பிட் கதவைத் திறந்ததால், குழுவினரும் பயணிகளும் உள்ளே சென்று துணை விமானியை கட்டுப்படுத்தினர். விமானத்தில் இருந்த பணியில் இல்லாத இரு விமானிகள் பின்னர் கட்டுப்பாட்டை ஏற்று, சவுதி அரேபியாவின் தபூக் விமான நிலையத்தில் பாதுகாப்பாகத் தரையிறக்கினர். அல்-ஹம்மானி கைது செய்யப்பட்டு ஐக்கிய அரபு அமீரகத்தில் விசாரிக்கப்பட்டு வருகிறார். அதிகாரப்பூர்வ தண்டனை அறிவிக்கப்படாத நிலையில், அவருக்கு மரண தண்டனை விதிக்கப்படலாம் எனத் தெரிவிக்கப்பட்டுள்ளது.
