பெங்களூரு, மார்ச் 27-
பெங்களூரு மாநகரம் முழுவதும் இன்று ஸ்ரீ ராம நவமி விழா பக்தி பரவசத்துடன் மிகச் சிறப்பாகக் கொண்டாடப்பட்டது. நகரின் பல்வேறு பகுதிகளில் உள்ள ராமர் கோவில்கள் மற்றும் விஷ்ணு ஆலயங்களில் அதிகாலை முதலே சிறப்பு அபிஷேகங்கள், அலங்காரங்கள் மற்றும் மஹா தீபாராதனைகள் நடைபெற்றன.
மல்லேஸ்வரம், ராஜாஜிநகர் மற்றும் பசவனகுடி பகுதிகளில் உள்ள புகழ்பெற்ற கோவில்களில் ராமருக்கு வைரக் கிரீடம் மற்றும் மலர் அலங்காரங்கள் செய்யப்பட்டு மகா மங்களாரத்தி காட்டப்பட்டது.
பானகம் மற்றும் நீர்மோர்: கோடை வெயிலைத் தணிக்க பக்தர்களுக்கு பாரம்பரிய முறையில் பானகம், நீர்மோர் மற்றும் கோசம்பரி பிரசாதமாக வழங்கப்பட்டன.பல இடங்களில் ராமாயண சொற்பொழிவுகள் மற்றும் தியாகராஜ ஆராதனை இசை நிகழ்ச்சிகள் ஏற்பாடு செய்யப்பட்டிருந்தன.
ஆயிரக்கணக்கான பக்தர்கள் நீண்ட வரிசையில் நின்று சுவாமி தரிசனம் செய்தனர். விழாவையொட்டி நகரின் முக்கிய வீதிகள் தோரணங்களாலும் மின் விளக்குகளாலும் அலங்கரிக்கப்பட்டு விழாக்கோலம் பூண்டிருந்தன. இதேபோல் கர்நாடக மாநிலம் முழுவதும் ஸ்ரீ ராம நவமி சிறப்பாக கொண்டாடப்பட்டது. நகரம் கிராமம் என்று அனைத்து இடங்களிலும் நீர் பானகங்கள் விநியோகிக்கப்பட்டன
