டோக்கியோ: செப். 21:
ஜப்பானின் அய்ச்சி–நகோயாவில் நடைபெற்று வரும் 20-வது ஆசிய விளையாட்டுப் போட்டியில் இந்தியா இதுவரை 4 வெள்ளி, 2 வெண்கலம் என மொத்தம் 6 பதக்கங்களை வென்றுள்ளது. பதக்கப் பட்டியலில் இந்தியா 10-வது இடத்தில் உள்ளது.
செப்டம்பர் 19 முதல் அக்டோபர் 4-ம் தேதி வரை நடைபெறும் இப்போட்டியில் 45 நாடுகளைச் சேர்ந்த 11,000 பேர் பங்கேற்கின்றனர். இந்தியா சார்பில் 35 போட்டிகளில் 267 வீரர்கள், 234 வீராங்கனைகள் என மொத்தம் 501 பேர் பங்கேற்றுள்ளனர்.
இன்று நடைபெற்ற ஆடவர் 10 மீட்டர் ஏர் ரைபிள் அணிப் பிரிவில் ருத்ராங்க்ஷ் பாலாசாகேப் பாட்டீல், பார்த்த் ராகேஷ் மானே, ஹிமான்ஷு தில்லான் ஆகியோர் வெள்ளிப் பதக்கம் வென்றனர். இதற்கு முன், பெண்களுக்கான 10 மீட்டர் ஏர் ரைபிள் அணிப் பிரிவில் இளவேனில் வாலறிவன், விதர்ஷா வினோத், சோனம் மஸ்கர் ஆகியோர் அடங்கிய இந்திய அணி வெள்ளிப் பதக்கம் கைப்பற்றியது. தனிநபர் பிரிவிலும் இளவேனில் வாலறிவன் வெள்ளி வென்றிருந்தார். ஆடவர் 10 மீட்டர் ஏர் ரைபிள் தனிநபர் பிரிவில் ஹிமான்ஷு தில்லான் வெள்ளியும், மற்றொரு இந்திய வீரரான ருத்ரான்ஷ் பாட்டீல் வெண்கலமும் வென்றனர். ருத்ரான்ஷ் பாட்டீல் ஏற்கெனவே குழுப் பிரிவிலும் வெண்கலம் வென்றதாகத் தெரிவிக்கப்பட்டுள்ளது. இதன்மூலம் துப்பாக்கிச்சுடுதல் பிரிவில் மட்டும் இந்தியா 5 பதக்கங்களைப் பெற்றுள்ளது. தற்காப்புக் கலைப் பிரிவில் இந்திய வீராங்கனை சுசித்கா தரியால் வெண்கலப் பதக்கம் வென்றார். ஆசிய விளையாட்டில் இப்பிரிவில் இந்தியா பதக்கம் வெல்வது இதுவே முதல்முறையாகும். பதக்கப் பட்டியலில் சீனா 14 தங்கம், 6 வெள்ளி, 3 வெண்கலம் என 23 பதக்கங்களுடன் முதலிடத்திலும், ஜப்பான் 21 பதக்கங்களுடன் இரண்டாமிடத்திலும், கொரியா 16 பதக்கங்களுடன் மூன்றாமிடத்திலும் உள்ளன. கஜகஸ்தான் 7, தாய்லாந்து 4 பதக்கங்களுடன் அடுத்தடுத்த இடங்களில் உள்ளன.
