இரவு நேர ஹை பீம் விளக்குகளால்அதிகரிக்கும் விபத்துகள் – போலீசார் எச்சரிக்கை

பெங்களூர்: செப். 23-
கர்நாடக மாநிலத்தில் நாளுக்கு நாள் சாலை விபத்துகளின் எண்ணிக்கை அதிகரித்து வரும் நிலையில், இரவு நேரத்தில் நடக்கும் பெரும்பாலான விபத்துகளுக்கு வாகன ஓட்டிகளிடையே முகப்பு விளக்கு பயன்பாடு குறித்த விழிப்புணர்வு இல்லாததே முக்கிய காரணமாக உள்ளது. வாகனங்களை இயக்கும்போது எந்த நேரத்தில் அதிக வெளிச்சம் தரும் விளக்கு மற்றும் குறைந்த வெளிச்சம் தரும் விளக்கு பயன்படுத்த வேண்டும் என்ற குறைந்தபட்ச அறிவுகூட இல்லாமல் வாகனங்களை இயக்குவது, எதிரே வரும் வாகன ஓட்டிகளின் உயிருக்கு பேராபத்தாக முடிகிறது.
இதனைத் தொடர்ந்து, இரவு நேரத்தில் வாகனங்களை இயக்குபவர்களுக்கு விளக்குகளைப் பயன்படுத்துவது குறித்து போக்குவரத்து போலீசாரும், போக்குவரத்துத் துறையும் கடுமையான உத்தரவுகளையும், விழிப்புணர்வு வழிகாட்டுதல்களையும் வெளியிட்டுள்ளனர்.
அதிக வெளிச்ச விளக்குகளின் ஆபத்து:
நகர்ப்புறங்களிலும், தெருவிளக்குகள் உள்ள சாலைகளிலும் பல வாகன ஓட்டிகள் தேவையில்லாமல் முகப்பு விளக்கை அதிக வெளிச்ச நிலையிலேயே வைத்துக்கொண்டு வாகனங்களை ஓட்டுகின்றனர். எதிரே வரும் வாகனத்தின் அதிக வெளிச்சம் டிரைவரின் கண்ணில் நேரடியாக விழும்போது, 3 முதல் 5 விநாடிகள் வரை கண்கள் முழுமையாக இருண்டுபோகின்றன. மணிக்கு 60 கிலோமீட்டர் வேகத்தில் செல்லும் ஒரு வாகனம், இந்த 3 விநாடிகளில் சுமார் 50 மீட்டருக்கும் அதிகமான தூரத்தைக் கட்டுப்பாடின்றி கடந்துவிடுகிறது.
இது பயங்கர விபத்துகளுக்கு வழிகோலுகிறது. பின்னால் வரும் வாகனம் அதிக வெளிச்சத்தில் இருந்தால், முன்னால் செல்லும் வாகனத்தின் பின்னோக்கு கண்ணாடி வழியாக அந்த வெளிச்சம் டிரைவரின் கண்ணை உறுத்தி, கவனத்தை சிதறடிக்கிறது.
அபராதம் மற்றும் வழக்கு பாயும்:
தேவையில்லாமல் அதிக வெளிச்ச விளக்குகளைப் பயன்படுத்தி வாகனங்களை ஓட்டுவது மற்றும் அளவுக்கு அதிகமான வெளிச்சம் தரும் மின் விளக்குகளைப் பொருத்தி எதிரே வரும் ஓட்டுநர்களுக்கு இடையூறு ஏற்படுத்துபவர்களுக்கு எதிராக போக்குவரத்து போலீசார் தீவிர சிறப்பு வேட்டையைத் தொடங்கியுள்ளனர்.
விதியை மீறும் வாகன ஓட்டிகளுக்கு மோட்டார் வாகனச் சட்டத்தின் கீழ் அபராதம் விதிக்கப்பட்டு வருகிறது. மீண்டும் மீண்டும் விதியை மீறினால் ஓட்டுநர் உரிமம் ரத்து செய்யப்படும் என்றும் எச்சரிக்கப்பட்டு உள்ளது.
இரவு நேரத்தில் முகப்பு விளக்குகளை சரியாகப் பயன்படுத்துவது வெறும் போக்குவரத்து விதியைப் பின்பற்றுவது மட்டுமல்ல; பிற வாகன ஓட்டிகளின் பாதுகாப்பின் நோக்கிலும் மிகவும் முக்கியமானது.
முக்கிய விதிகள்:

• நகர்ப்புற சாலைகள், சிக்னல்கள் மற்றும் இருள் இல்லாத தெருக்களில் எப்போதும் குறைந்த வெளிச்ச விளக்குகளை மட்டுமே பயன்படுத்த வேண்டும்.
• நெடுஞ்சாலை அல்லது இருட்டான சாலையில் அதிக வெளிச்சத்தில் சென்றாலும், எதிரே மற்றொரு வாகனம் வருவது தெரிந்தால் உடனடியாக விளக்கு வெளிச்சத்தைக் குறைக்க வேண்டும்.
• உங்கள் வாகனம் மற்றொரு வாகனத்திற்கு பின்னால் 200 மீட்டருக்கும் குறைவான இடைவெளியில் சென்றால், குறைந்த வெளிச்ச நிலையிலேயே இருக்க வேண்டும். இதனால் முன்னால் செல்லும் டிரைவருக்கு வாகனம் ஓட்டுவதில் சிரமம் இருக்காது.
• அடர்ந்த பனி அல்லது கனமழை பெய்யும்போது அதிக வெளிச்சம் பனியில் எதிரொலித்து உங்களுக்கே சாலை தெரியாமல் செய்துவிடும். இதுபோன்ற நேரங்களில் குறைந்த வெளிச்ச விளக்கு, பனி விலக்கு விளக்கு மற்றும் எச்சரிக்கை விளக்குகளைப் பயன்படுத்த வேண்டும்.
• நிறுவனங்கள் வழங்கும் விளக்குகளை விட அதிக திறன் கொண்ட வெள்ளை நிற மின் விளக்குகள் மற்றும் பிற விளக்குகளைப் பொருத்துவது மோட்டார் வாகனச் சட்டத்தின்படி குற்றமாகும்.