பெங்களூரு: செப். 26-
மத்திய தேர்தல் ஆணையத்தின் தலைமை தேர்தல் ஆணையர் ஞானேஷ்குமார் தனது பதவியை ராஜினாமா செய்ய வலியுறுத்தி, கர்நாடக மாநில காங்கிரஸ் கட்சி சார்பில் இன்று கர்நாடக மாநிலம் முழுவதும் கண்டன போராட்டம் நடத்தப்பட்டது. பெங்களூரில் உள்ள சுதந்திர பூங்காவில் (ஃப்ரீடம் பார்க்) காங்கிரஸ் தலைவர்கள் திரண்டு போராட்டத்தில் ஈடுபட்டனர்.
மாநிலத்தின் அனைத்து மாவட்டங்களிலும் காங்கிரஸ் தலைவர்களும், தொண்டர்களும் ஆர்ப்பாட்டத்தில் ஈடுபட்டனர். பெங்களூரு சுதந்திர பூங்காவில் நடைபெற்ற போராட்டத்தில் முதலமைச்சர் டி.கே.சிவகுமார், முன்னாள் முதலமைச்சர் சித்தராமையா, கே.பி.சி.சி. தலைவர் பி.கே.ஹரிபிரசாத் மற்றும் காங்கிரஸ் அமைச்சர்கள், எம்.எல்.ஏ.க்கள், எம்.பி.க்கள் பலர் கலந்துகொண்டு தலைமை தேர்தல் ஆணையர் ஞானேஷ்குமாரின் ராஜினாமாவை வலியுறுத்தி குரல் எழுப்பினர்.
தலைமை தேர்தல் ஆணையர் ஞானேஷ்குமார் பா.ஜ.க.வுக்கு ஆதரவாக செயல்படுவதாக போராட்டத்தில் ஈடுபட்ட காங்கிரஸ் தலைவர்கள் காரசாரமாக குற்றம்சாட்டியதுடன், எஸ்.ஐ.ஆர். (SIR) நடைமுறையை உடனடியாக ரத்து செய்ய வேண்டும் என்றும் கோரிக்கை விடுத்தனர்.
மத்திய தேர்தல் ஆணையத்தின் தலைமை தேர்தல் ஆணையர் ஞானேஷ்குமார் தனது பதவியை ராஜினாமா செய்ய வேண்டும், இல்லையெனில் அவரை கைது செய்ய வேண்டும் என்றும் அவர்கள் வலியுறுத்தினர்.
தலைமை தேர்தல் ஆணையரின் செயல்பாடுகளுக்கு எதிராக, தேர்தல் ஆணையத்தின் மற்ற இரு ஆணையர்களும் குரல் எழுப்பியுள்ளனர். எஸ்.ஐ.ஆர். நடைமுறையில் முறைகேடு நடந்துள்ளது. எனவே, இந்த எஸ்.ஐ.ஆர். நடைமுறையை ரத்து செய்ய வேண்டும் என்று போராட்டத்தில் ஈடுபட்டவர்கள் கோரினர்.
ஞானேஷ்குமாருக்கு எதிராகவும், மத்திய அரசுக்கு எதிராகவும், பிரதமர் மோடி மற்றும் உள்துறை அமைச்சர் அமித் ஷா ஆகியோருக்கு எதிராகவும் காங்கிரஸ் தலைவர்களும் தொண்டர்களும் கண்டன கோஷங்களை எழுப்பி, சுவரொட்டிகளை கையில் ஏந்தி போராட்டம் நடத்தினர்.
மத்திய தேர்தல் ஆணையத்தின் தலைமை தேர்தல் ஆணையர் ஞானேஷ்குமார் ராஜினாமா செய்யும் வரை காங்கிரஸ் கட்சியின் போராட்டம் தொடரும் என்று காங்கிரஸ் தலைவர்கள் தெரிவித்தனர்.
