புதுடெல்லி, அக். 24-
அருணாசலப் பிரதேச எல்லைப் பகுதியில் சீன ராணுவத்துடன் மோதல் தொடர்வதாக இந்தோ–திபெத் எல்லை பாதுகாப்புப் படையின் தலைமை இயக்குநர் சத்ருஜீத் சிங் கபூர் தெரிவித்திருந்த நிலையில், அங்கு சீன ராணுவத்தின் நகர்வுகள் குறித்து இந்திய வெளியுறவு அமைச்சகம் விளக்கம் அளித்துள்ளது. எல்லை விவகாரம் தொடர்பாக சில கேள்விகள் பாதுகாப்பு அமைச்சகத்திடம் எழுப்பப்பட்டுள்ளதாக வெளியுறவு அமைச்சகம் தெரிவித்தது.
கடந்த காலங்களைப் போலவே, இந்தியா–சீனா எல்லைப் பகுதியில் சீனப் படைகள் வழக்கமான ரோந்துப் பணியில் இருந்து விலகிச் செல்லும்போது குழப்பமான சூழல் ஏற்படுவதாகவும் கூறியுள்ளது. இரு நாடுகளும் எல்லைக் கட்டுப்பாட்டுப் பகுதியில் நிலவும் பிரச்சினைகளைத் தீர்க்க அரசாங்க ரீதியிலான பேச்சுவார்த்தைகளைத் தொடர்ந்து நடத்தி வருகின்றன.
இதற்கான ராணுவ வழிமுறைகளும் பின்பற்றப்பட்டு வருவதுடன், அவற்றை மேம்படுத்த இரு தரப்பும் செயல்பட்டு வருவதாக அமைச்சகம் தெரிவித்துள்ளது. எல்லைப் பகுதிகளில் அமைதியைப் பேணுவது இரு நாடுகளின் உறவுகளின் ஒட்டுமொத்த வளர்ச்சிக்கு அவசியம் என்றும் வலியுறுத்தியுள்ளது. அருணாசலப் பிரதேசத்தின் பல்வேறு பகுதிகளுக்கு சீனா தொடர்ந்து உரிமை கோரி வருகிறது.
அந்த மாநிலத்தை ‘ஜாங்னான்’ என்றும் குறிப்பிடுகிறது. இதற்கு பதிலளிக்கும் வகையில், இந்திய நில அளவைத் துறை அருணாசலப் பிரதேசத்தின் 27 இடங்களை உள்ளடக்கிய அதிகாரப்பூர்வ வரைபடத்தை வெளியிட்டது. அந்த இடங்களின் புவியியல் அம்சங்களும் இந்தியப் பெயர்களும் அதில் இடம்பெற்றுள்ளன. இதற்கு சீனா ஆட்சேபம் தெரிவித்துள்ளது.
அருணாசலப் பிரதேசம் இந்தியாவின் பிரிக்க முடியாத ஒருங்கிணைந்த பகுதி; அது இருந்தது, இருக்கிறது, இனியும் இருக்கும் என வெளியுறவு அமைச்சக செய்தித் தொடர்பாளர் ரந்திர் ஜெய்ஸ்வால் தெரிவித்துள்ளார். இதற்கிடையில், அருணாசலத்தில் சீன மக்கள் விடுதலை ராணுவத்துடனான பதற்றத்தின் போது, புதிதாக உருவாக்கப்பட்ட ‘ஷௌர்யா’ கமாண்டோ பிரிவு திறமையை நிரூபித்ததாக சத்ருஜீத் சிங் கபூர் கூறியதை காங்கிரஸ் விமர்சித்துள்ளது. மோதல் தகவல்கள் ஜூலை முதல் மறைக்கப்படுவதாகவும், பிரதமர் மவுனம் காப்பதாகவும் காங்கிரஸ் குற்றம்சாட்டியது. சீனாவுடனான வர்த்தகப் பற்றாக்குறை 2025–26-ம் நிதியாண்டில் 112 பில்லியன் டாலராக உயர்ந்துள்ளதாக ஜெய்ராம் ரமேஷ் தெரிவித்துள்ளார்.
