
பொன்னேரி: நவ. 19-
ஹவாலா பணம், கஞ்சா கடத்தல் குறித்து எண்ணூர் போலீஸாருக்கு கிடைத்த ரகசியத் தகவலையடுத்து எண்ணூர், அத்திப்பட்டு மேம்பாலம் சந்திப்பு வாகனசோதனை சாவடியில் போலீஸார்வாகன சோதனையில் ஈடுபட்டனர்.
அப்போது மீஞ்சூர் நோக்கிச் சென்ற சொகுசு காரை நிறுத்தி சோதனை செய்தனர். அப்போது காரில் இருந்த 5 சூட்கேஸ்கள் மற்றும் 2 தோள் பைகளில் 9,700 இங்கிலாந்து பவுண்டுகள், ரூ.6.42 லட்சம் ரொக்கம், மருந்துப் பொருட்கள், 2.6 கிலோ உயர்ரக கஞ்சா ஆகியவை இருந்தது தெரியவந்தது.
இதையடுத்து காரில்பயணம் செய்த சிவகங்கை, இளையான்குடியை சேர்ந்த ஆஷிக் அலி(29), அபுபக்கர் சித்திக்(21), உசாமா பதுருர் ரஹ்மான்(24), திருச்சி- உறையூரை சேர்ந்த முகமது இஸ்மாயில்(19), தஞ்சாவூரைச் சேர்ந்த ஷேக் அப்துல்லா(22) ஆகியோரிடம் போலீஸார் தீவிர விசாரணை நடத்தினர்.
அவ்விசாரணையில் ஆஷிக் அலி என்பவர்தான் தன் நண்பர்களான அபுபக்கர் சித்திக், முகமது இஸ்மாயில், உசாமா பதுருர் ரஹ்மான் ஆகியோர் மூலம் இவற்றை மலேசியாவுக்கு கடத்திச் செல்ல திட்டமிட்டு காரில் பெங்களூரு நோக்கிச் சென்றபோது போலீஸாரிடம் சிக்கியுள்ளனர் என்பது தெரியவந்துள்ளது.
இதுகுறித்து வழக்குப் பதிவுசெய்த போலீஸார், ஆஷிக் அலி உள்ளிட்ட 5 இளைஞர்களை கைது செய்து, அவர்களிடமிருந்த 9,700 இங்கிலாந்து பவுண்டுகள், ரூ.6.42 லட்சம் ரொக்கம்,2.6 கிலோ உயர்ரக கஞ்சா, 3 பேரின் பாஸ்போர்ட்கள் உள்ளிட்டவற்றை பறிமுதல் செய்தனர்.













