Home மாவட்டங்கள் பெங்களூர் பெங்களூரில் 100-க்கும் மேற்பட்ட ரவுடிகளின் வீடுகளில் அதிரடி சோதனை

பெங்களூரில் 100-க்கும் மேற்பட்ட ரவுடிகளின் வீடுகளில் அதிரடி சோதனை

பெங்களூரு, நவ. 22-

பெங்களூரு நகரில் ரவுடிகளின் அட்டகாசத்தைக் கட்டுப்படுத்தும் வகையில், புதிதாக உருவாக்கப்பட்டுள்ள ரவுடி ஒழிப்புப் படை அதிகாரிகள் மற்றும் போலீசார் இன்று அதிகாலை முதல் நகரம் முழுவதும் அதிரடி சோதனையில் ஈடுபட்டனர்.

அதிகாலை முதலே நகரின் பல்வேறு பகுதிகளில் உள்ள ரவுடிகளின் வீடுகளுக்குள் ரவுடி ஒழிப்புப் படை அதிகாரிகள் மற்றும் போலீசார் ஒரே நேரத்தில் நுழைந்து தீவிர சோதனை நடத்தினர்.

நகரில் அதிகரித்து வரும் ரவுடிகளின் செயல்பாடுகளுக்கு முற்றுப்புள்ளி வைக்குமாறு முதல்-மந்திரி டி.கே. சிவகுமார் போலீசாருக்கு உத்தரவிட்டிருந்தார். இதன் தொடர்ச்சியாக, புதிய நகர போலீஸ் கமிஷனர் ஆர். ஹிதேந்திரா உயர் போலீஸ் அதிகாரிகளுடன் ஆலோசனை நடத்தி, ரவுடிகள் மீது கடும் நடவடிக்கை எடுக்குமாறு எச்சரிக்கை விடுத்திருந்தார்.

இதன் அடிப்படையில், ரவுடி ஒழிப்புப் படைத் தலைவரும், போக்குவரத்துப் பிரிவு போலீஸ் கமிஷனருமான ஹேமந்த் நிம்பாள்கர் தலைமையில் இந்த சிறப்பு வேட்டை நடத்தப்பட்டது. நகரின் அனைத்துப் பிரிவுகளைச் சேர்ந்த உயர் போலீஸ் அதிகாரிகளும், காவலர்களும் இந்த அதிரடி சோதனையில் பங்கேற்றனர்.

100-க்கும் மேற்பட்ட ரவுடிகள் வீட்டில் சோதனை

நகரின் பல்வேறு போலீஸ் நிலைய எல்லைகளில் அடையாளம் காணப்பட்டுள்ள பிரபல ரவுடிகளின் பட்டியலின் அடிப்படையில் போலீசார் இந்த நடவடிக்கையை மேற்கொண்டனர். 100-க்கும் மேற்பட்ட ரவுடிகளின் வீடுகளுக்குச் சென்ற போலீசார், அவர்களின் தற்போதைய செயல்பாடுகள், தொடர்புகள் மற்றும் நடமாட்டம் குறித்த முழு விவரங்களைச் சேகரித்தனர்.

இதனிடையே, போலீஸ் கமிஷனர் ஆர். ஹிதேந்திரா மற்றும் ரவுடி ஒழிப்புப் படைத் தலைவர் ஹேமந்த் நிம்பாள்கர் ஆகியோர் நகரின் பல்வேறு பகுதிகளுக்கு நேரில் சென்று சோதனைப் பணிகளை ஆய்வு செய்தனர்.

ஹெண்ணூர் போலீஸ் நிலைய எல்லைக்குட்பட்ட ரவுடி கிஷோர் என்கிற குட்டே என்பவரது வீட்டிற்கும் போலீசார் சென்று சோதனை நடத்தினர்.

கடும் நடவடிக்கை எச்சரிக்கை

நகரில் குற்றச் செயல்களைக் கட்டுப்படுத்துவது, ரவுடிகளின் சட்டவிரோதச் செயல்பாடுகளுக்குத் தடை போடுவது மற்றும் பொதுமக்களின் பாதுகாப்பை உறுதி செய்வது ஆகிய நோக்கங்களுக்காக இந்த சிறப்பு சோதனை நடத்தப்பட்டுள்ளது. வரும் நாட்களிலும் ரவுடிகளின் நடமாட்டத்தைத் தொடர்ந்து கண்காணித்து, சட்டவிரோதச் செயல்களில் ஈடுபடுவோர் மீது மிகக் கடுமையான நடவடிக்கை எடுக்க போலீசார் திட்டமிட்டுள்ளனர்