புதுடெல்லி: செப். 24-
சமையல் எண்ணெய் இறக்குமதிக்கான சுங்க வரி குறைக்கப்பட்டுள்ளதைத் தொடர்ந்து, சில்லறை விலைகள் குறைய வாய்ப்புள்ளதாக இந்திய காய்கறி எண்ணெய் உற்பத்தியாளர்கள் சங்கம் (ஐ.வி.பி.ஏ.) தெரிவித்துள்ளது.
சோயாபீன், பாமாயில், சூரியகாந்தி எண்ணெய் ஆகியவற்றின் கச்சா மற்றும் சுத்திகரிக்கப்பட்ட வகைகளுக்கான அடிப்படை சுங்க வரியை மத்திய அரசு புதன்கிழமை குறைத்தது. கச்சா சூரியகாந்தி எண்ணெய்க்கான வரி 10 சதவீதத்தில் இருந்து பூஜ்ஜியமாகக் குறைக்கப்பட்டது. சுத்திகரிக்கப்பட்ட சூரியகாந்தி எண்ணெய்க்கான வரி 32.5 சதவீதத்தில் இருந்து 22.5 சதவீதமாகக் குறைக்கப்பட்டுள்ளது.
கச்சா சோயாபீன் எண்ணெய் மற்றும் பாமாயிலுக்கான வரி 10 சதவீதத்தில் இருந்து 5 சதவீதமாகவும், சுத்திகரிக்கப்பட்ட சோயாபீன் எண்ணெய் மற்றும் பாமாயிலுக்கான வரி 32.5 சதவீதத்தில் இருந்து 27.5 சதவீதமாகவும் குறைக்கப்பட்டுள்ளது.ஐ.வி.பி.ஏ. தலைவர் சுதாகர் தேசாய் கூறுகையில், “பண்டிகைக் காலம் நெருங்கும் நிலையில், குறிப்பிட்ட சமையல் எண்ணெய் இறக்குமதிகளுக்கான சுங்க வரி குறைப்பு முக்கியமான நேரத்தில் மேற்கொள்ளப்பட்டுள்ளது. குறைந்த இறக்குமதி வரி, இறக்குமதி செய்யப்படும் எண்ணெய்களின் இறங்குமதி செலவைக் குறைத்து, நுகர்வோர் விலையில் ஓரளவு குறைப்பை ஏற்படுத்தலாம்” என்றார். வரவிருக்கும் பண்டிகைக் காலங்களில் நாடு முழுவதும் போதுமான எண்ணெய் கிடைப்பதை உறுதி செய்வதே உடனடி முன்னுரிமை என்றும் அவர் தெரிவித்தார். வீடுகள் மட்டுமின்றி, இனிப்புகள், சிற்றுண்டிகள், உணவு சேவை மற்றும் ஹோட்டல்-உணவகம்-கேட்டரிங் துறைகளிலும் தேவை அதிகரிக்கும் என அவர் கூறினார். சூரியகாந்தி எண்ணெய்க்கான வரிக் குறைப்பு அதிகமாக இருப்பதால், குறிப்பாக தென்னிந்தியாவின் முக்கிய நுகர்வு பகுதிகளில் அது மலிவாகும் என்றும் தேசாய் தெரிவித்தார். இந்தியா தனது சமையல் எண்ணெய் தேவையில் சுமார் 60 சதவீதத்தை இறக்குமதி செய்கிறது. எனவே, சர்வதேச விலை, சரக்கு போக்குவரத்து செலவு, மாற்று விகிதம், உள்நாட்டு இருப்பு உள்ளிட்ட காரணிகளும் சில்லறை விலையில் தாக்கம் செலுத்தும் என்றார். மதிப்பீட்டின்படி, அக்டோபரில் முடியும் நடப்பு சந்தைப்படுத்தல் ஆண்டில் இந்தியாவின் சமையல் எண்ணெய் இறக்குமதி செலவு 9 சதவீதம் அதிகரித்து ரூ.1.75 லட்சம் கோடியாகலாம். 2025-26 எண்ணெய் ஆண்டின் நவம்பர்–ஆகஸ்ட் காலத்தில் தாவர எண்ணெய் இறக்குமதி 4 சதவீதம் உயர்ந்து 138.8 லட்சம் டன்னாகியுள்ளது.
