ஜெருசலேம், நவ. 8-
இஸ்ரேலில் அண்மையில் நடைபெற்ற பொதுத்தேர்தலில் எந்தவொரு கூட்டணிக்கும் தெளிவான பெரும்பான்மை கிடைக்காத நிலையில், ஆட்சி அமைக்குமாறு யஷார் கட்சியின் தலைவர் காடி ஐசன்கோட்டுக்கு அதிபர் ஐசக் ஹெர்சாக் அழைப்பு விடுத்துள்ளார். கடந்த அக். 27-ஆம் தேதி நடைபெற்ற தேர்தலில், பெஞ்சமின் நெதன்யாகு தலைமையிலான கூட்டணி தனது பெரும்பான்மையை இழந்தது. 120 இடங்களைக் கொண்ட இஸ்ரேல் நாடாளுமன்றத்தில், நெதன்யாகுவின் கூட்டணி 53 இடங்களையும், காடி ஐசன்கோட் தலைமையிலான எதிர்க்கட்சிக் கூட்டணி 48 இடங்களையும் கைப்பற்றின. தனித்து ஆட்சி அமைக்கத் தேவையான 61 இடங்களை எந்தக் கூட்டணியும் பெறவில்லை. இதையடுத்து, நாடாளுமன்றக் கட்சிகளுடன் அதிபர் ஐசக் ஹெர்சாக் ஆலோசனை நடத்தினார். அப்போது, இஸ்ரேலின் அரபு சிறுபான்மை மக்களைப் பிரதிநிதித்துவப்படுத்தும் இரு முக்கியக் கட்சிகள் காடி ஐசன்கோட்டுக்கு ஆதரவு தெரிவித்தன. இதன் மூலம், 67 நாடாளுமன்ற உறுப்பினர்களின் ஆதரவு பரிந்துரையை ஐசன்கோட் பெற்றார். இதையடுத்து, அவரை ஆட்சி அமைக்க அழைப்பதாக அதிபர் மாளிகை அறிவித்துள்ளது. இதற்கான அதிகாரபூர்வ நிகழ்வு ஞாயிற்றுக்கிழமை ஜெருசலேமில் உள்ள அதிபர் மாளிகையில் நடைபெறுகிறது.அதிபரின் அறிவிப்பு குறித்து எக்ஸ் தளத்தில் பதிவிட்ட காடி ஐசன்கோட், “இது ஒரு தேசிய அவசரகால அரசாங்கத்தை அமைக்க வேண்டிய தருணம். மக்களின் நம்பிக்கைக்குரிய ஆட்சியை வழங்க அனைத்து முயற்சிகளையும் செய்வேன்” என்று தெரிவித்துள்ளார்.முன்னாள் ராணுவத் தளபதியான காடி ஐசன்கோட் ஆட்சி அமைத்தால், நீண்ட காலம் பிரதமராகப் பதவி வகித்த பெஞ்சமின் நெதன்யாகுவின் ஆட்சி முறைப்படி முடிவுக்கு வரும். ஆட்சி அமைக்க ஐசன்கோட்டுக்கு 28 நாட்கள் கால அவகாசம் வழங்கப்படும். தேவைப்பட்டால் அதிபர் மேலும் 14 நாட்கள் கூடுதல் அவகாசம் அளிக்கலாம். இந்தக் காலத்துக்குள் 61 உறுப்பினர்களின் ஆதரவைத் திரட்ட முடியாவிட்டால், இஸ்ரேல் மீண்டும் பொதுத்தேர்தலைச் சந்திக்க வேண்டிய சூழல் ஏற்படும்.
