பெங்களூரு, நவ. 12-
பிரதமர் நரேந்திர மோடி நாளை வருகை தர உள்ளதையொட்டி, நகரில் முன்னெப்போதும் இல்லாத அளவிற்குப் பலத்த பாதுகாப்பு ஏற்பாடுகள் செய்யப்பட்டுள்ளன.
பிரதமரின் வருகையின்போது இந்த முறை எந்தவிதப் பாதுகாப்புக் குறைபாடும் ஏற்படாத வகையில் காவல்துறையினரும், சிறப்புப் பாதுகாப்புப் படையினரும் தீவிரக் கண்காணிப்பில் ஈடுபட்டுள்ளனர்.
பிரதமர் செல்லவுள்ள சாலை மார்க்கங்கள், மெட்ரோ ரயில் நிலையங்கள் மற்றும் நிகழ்ச்சி நடைபெறும் இடங்களைச் சிறப்புப் பாதுகாப்புப் படை குழுவினர் கடந்த பத்து நாட்களாகத் தீவிரமாக ஆய்வு செய்து வருகின்றனர். பிரதமர் செல்லும் வழித்தடங்களில் கண்காணிப்பு கேமராக்கள் பொருத்தப்பட்டுத் தொடர்ந்து கண்காணிக்கப்பட்டு வருகிறது.
மேலும், பிரதமர் செல்லும் பாதைகளில் உள்ள பெரிய கட்டிடங்களின் மீதும் கூடுதல் காவலர்கள் பணியமர்த்தப்பட்டுள்ளனர். அதிக ஆபத்து நிறைந்த அடுக்குமாடி குடியிருப்புகளில் காவல்துறையினர் சோதனை நடத்தி வருவதுடன், புதிதாக யாரேனும் வந்து தங்கியிருந்தால் அது குறித்துக் காவல்துறைக்குத் தகவல் தெரிவிக்குமாறு குடியிருப்பாளர்களுக்கு அறிவுறுத்தியுள்ளனர். சாலைகளில் சிறப்புச் சோதனை நடவடிக்கைகளை மேற்கொள்ளுமாறும் சிறப்புப் பாதுகாப்புப் படை அதிகாரிகள் உத்தரவிட்டுள்ளனர்.
கடந்த மே 10-ம் தேதி பிரதமர் மோடி பெங்களூருவிற்கு வருகை தந்தபோது, கனகபுரா சாலையில் உள்ள ஆர்ட் ஆப் லிவிங் ஆசிரமம் செல்லும் வழியில் இரண்டு ஜெலட்டின் குச்சிகள் கண்டெடுக்கப்பட்டன. பிரதமரின் பாதுகாப்பு வாகன அணிவகுப்பு செல்வதற்கு சுமார் அரை மணி நேரத்திற்கு முன்பு காவல்துறையினர் அவற்றைக் கண்டுபிடித்துச் செயலிழக்கச் செய்தனர். இந்தச் சம்பவம் பெரும் பாதுகாப்புப் பதற்றத்தை ஏற்படுத்தியிருந்தது. இந்தச் சம்பவத்தைத் தொடர்ந்து, பாதுகாப்புக் குறைபாடு புகாரின் பேரில் ஒரு உதவி ஆய்வாளர் உட்பட ஆறு காவலர்கள் பணியிடை நீக்கம் செய்யப்பட்டனர். தேசியப் புலனாய்வு முகமையும் இந்தச் சம்பவம் குறித்துத் தகவல்களைத் திரட்டி விசாரணை நடத்தியது.
இதனால், நகரக் காவல் ஆணையர் சீமந்த் குமார் தலைமையில் பிரம்மாண்டமான காவல் பாதுகாப்பு ஏற்பாடுகள் செய்யப்பட்டுள்ளன. மூன்று இணைக் காவல் ஆணையர்கள், பதினைந்து துணை ஆணையர்கள், இருபது உதவி ஆணையர்கள், முப்பது ஆய்வாளர்கள், நூற்றுக்கும் மேற்பட்ட உதவி ஆய்வாளர்கள் மற்றும் ஆயிரத்திற்கும் மேற்பட்ட சட்டம்-ஒழுங்கு காவலர்கள் பாதுகாப்புப் பணியில் ஈடுபடுத்தப்பட்டுள்ளனர்.
நாளை காலை பெங்களூரு வரவுள்ள பிரதமர் மோடி, பிரசாந்தி குட்டீரம் பொன்விழா நிகழ்ச்சியில் கலந்து கொள்கிறார். அதனைத் தொடர்ந்து, தாவரெகெரே மெட்ரோ நிலையத்தில் நம்ம மெட்ரோ பிங்க் வழித்தடத்தைத் தொடங்கி வைக்கிறார். அங்கிருந்து ஐஐஎம் பெங்களூரு மெட்ரோ நிலையம் வரை மெட்ரோ ரயிலில் அவர் பயணம் செய்ய உள்ளார்.
