புதுடெல்லி: நவ. 5-
உத்தர பிரதேச சட்டப்பேரவைத் தேர்தலில் காங்கிரஸ் கட்சியின் தேர்தல் பொறுப்பாளராக மீண்டும் பிரியங்கா வத்ரா பொறுப்பேற்றுள்ளார். கடந்த சட்டப்பேரவைத் தேர்தலிலும் காங்கிரஸ் கட்சியின் உத்தர பிரதேச பொறுப்பாளராக பிரியங்கா காந்தி செயல்பட்டார். இந்நிலையில், அடுத்த சட்டப்பேரவைத் தேர்தலுக்கான கட்சிப் பணிகளை ஒருங்கிணைக்கும் பொறுப்பை அவர் மீண்டும் ஏற்றுக்கொண்டுள்ளார்.
கடந்த முறை நடைபெற்ற உத்தர பிரதேச சட்டப்பேரவைத் தேர்தலில், மாநிலத்தின் அனைத்து தொகுதிகளிலும் காங்கிரஸ் வேட்பாளர்களை நிறுத்தியது. எனினும், அந்தத் தேர்தலில் காங்கிரஸ் கட்சியால் வெறும் 2 தொகுதிகளில் மட்டுமே வெற்றி பெற முடிந்தது. சமாஜ்வாதி கட்சி 111 தொகுதிகளிலும், பகுஜன் சமாஜ் கட்சி ஒரு தொகுதியிலும் வெற்றி பெற்றன. அதே தேர்தலில் 255 தொகுதிகளில் வெற்றி பெற்ற பாஜக, தொடர்ந்து இரண்டாவது முறையாக ஆட்சி அமைத்தது.
இந்தத் தேர்தல் முடிவுகளுக்குப் பிறகு, 2024 மக்களவைத் தேர்தலில் காங்கிரஸ் கட்சி சமாஜ்வாதியுடன் கூட்டணி அமைத்து போட்டியிட்டது. உத்தர பிரதேசத்தில் மொத்தம் 80 மக்களவைத் தொகுதிகள் உள்ள நிலையில், காங்கிரஸ் கட்சிக்கு 2 தொகுதிகளும், சமாஜ்வாதி கட்சிக்கு 37 தொகுதிகளும் கிடைத்தன.
தற்போது நடைபெற உள்ள சட்டப்பேரவைத் தேர்தலிலும் சமாஜ்வாதி கட்சியுடன் கூட்டணி அமைக்க காங்கிரஸ் விரும்புகிறது. இதற்கான அரசியல் நடவடிக்கைகள் குறித்து கட்சியின் பொதுச் செயலாளரான பிரியங்கா காந்தி கவனம் செலுத்தி வருகிறார். சட்டப்பேரவைத் தேர்தலுக்காக களமிறங்கியுள்ள அவர், உத்தர பிரதேசத்தில் காங்கிரஸ் கட்சியின் தேர்தல் பொறுப்பை முழுமையாக ஏற்றுக்கொண்டுள்ளார். தேர்தலை எதிர்கொள்வதற்கான கட்சியின் விரிவான வியூகத்தையும் அவர் வகுக்க உள்ளார்.
