புதுடெல்லி: செப்.11-
பிரிக்ஸ் மாநாட்டில் பங்கேற்பதற்காக ரஷ்ய அதிபர் புடின் டில்லி வந்தார். அவர் இன்று மதியம் 3 மணியளவில் பிரதமர் நரேந்திர மோடியை சந்தித்து முக்கிய பேச்சு நடத்துகிறார்.
பிரேசில், ரஷ்யா, இந்தியா, சீனா, தென் ஆப்ரிக்கா உள்ளிட்ட நாடுகள் உறுப்பினர்களாக உள்ள பிரிக்ஸ் அமைப்பின் 18வது உச்சி மாநாடு, டில்லியில் உள்ள பாரத் மண்டபத்தில் நாளை (செப். 12), நாளை மறுநாள் (செப். 13) ஆகிய இரண்டு நாட்கள் நடைபெறுகிறது.
இந்த மாநாட்டில் சீனா, ரஷ்யா, தென் ஆப்ரிக்கா மற்றும் ஈரான் அதிபர்கள் பங்கேற்கின்றனர். மாநாட்டையொட்டி டில்லியில் அனைத்து ஏற்பாடுகளும் செய்யப்பட்டுள்ளன. மாநாட்டில் பங்கேற்கும் தலைவர்களின் வருகையை முன்னிட்டு, தலைநகரில் பாதுகாப்பும் பலப்படுத்தப்பட்டுள்ளது.
இந்த நிலையில், மாநாட்டில் பங்கேற்பதற்காக ரஷ்ய அதிபர் புடின் டில்லி வந்தார். விமான நிலையத்தில் அவரை மத்திய இணை அமைச்சர் கே.வி. சிங் வரவேற்றார். புடினை வரவேற்ற புகைப்படத்தை சமூக வலைதளத்தில் பகிர்ந்த மத்திய வெளியுறவுத்துறை அமைச்சகத்தின் செய்தித் தொடர்பாளர் ரந்தீர் ஜெயஸ்வால் வெளியிட்ட பதிவில் கூறியிருப்பதாவது: “18வது பிரிக்ஸ் உச்சி மாநாட்டில் பங்கேற்க டில்லி வந்துள்ள ரஷ்ய அதிபர் புடினை அன்புடன் வரவேற்கிறோம். இந்தியாவும் ரஷ்யாவும் நீண்டகால உறவுகளை கொண்டுள்ளன” என ரந்தீர் ஜெயஸ்வால் தெரிவித்துள்ளார். டில்லி வந்துள்ள ரஷ்ய அதிபர் புடின், இன்று மதியம் 3 மணியளவில் பிரதமர் மோடியை சந்திக்கிறார். இந்த சந்திப்பின்போது இரு தலைவர்களும் முக்கிய பேச்சுவார்த்தை நடத்த உள்ளனர்.
