புதுடெல்லி, செப். 26-
தீவிரவாத சதி வழக்கில் கைது செய்யப்பட்ட அமெரிக்க கூலிப்படையைச் சேர்ந்த மேத்யூ ஆரோன் வான் டைக், தனது குடும்பத்தினரைச் சந்திப்பதற்காக ஒரு மாதம் சொந்த நாட்டுக்குச் செல்ல டெல்லி சிறப்பு நீதிமன்றம் அனுமதி வழங்கியுள்ளது. இதற்கு எதிர்ப்பு தெரிவித்து, அமெரிக்க அழுத்தத்துக்கு மத்திய அரசு அடிபணிந்துவிட்டதாகக் கூறி, பிரதமர் நரேந்திர மோடி மீது காங்கிரஸ் கட்சி கடும் விமர்சனம் செய்துள்ளது. மியான்மர் கிளர்ச்சிக் குழுக்களுக்கு ஆயுதங்கள் மற்றும் டிரோன் போர்முறைப் பயிற்சி அளித்ததாகக் கூறி, கடந்த மார்ச் மாதம் வான் டைக்கை தேசிய புலனாய்வு முகமை (என்.ஐ.ஏ.) கைது செய்தது. இந்த வழக்கில் டெல்லி சிறப்பு என்.ஐ.ஏ. நீதிமன்றம் செப்டம்பர் 18-ஆம் தேதி அவருக்கு சட்டப்பூர்வ பிணை வழங்கியது. தொடர்ந்து, செப்டம்பர் 24-ஆம் தேதி ஒரு மாத காலத்துக்கு சொந்த நாட்டுக்குச் செல்லவும் அனுமதி அளித்தது. இந்த நடவடிக்கையை காங்கிரஸ் மூத்த தலைவர் ஜெய்ராம் ரமேஷ் கடுமையாக விமர்சித்தார். இதுதொடர்பாக எக்ஸ் தளத்தில் அவர் வெளியிட்ட பதிவில், “சமரசம் செய்துகொள்ளும் பிரதமர் மீண்டும் அதைச் செய்துள்ளார்” என்று குறிப்பிட்டார். மேலும், வழக்கில் சட்டவிரோத நடவடிக்கைகள் (தடுப்பு) சட்டத்தின் பிரிவுகள் நீக்கப்பட்டதற்கான காரணம் என்ன என்றும், வெளிநாட்டினர் முறையான அனுமதியின்றி இந்தியாவுக்குள் நுழைந்து பயணம் செய்ய எவ்வாறு அனுமதிக்கப்பட்டனர் என்றும் கேள்வி எழுப்பினார். காங்கிரஸ் தலைவர் பவன் கேராவும் மத்திய அரசிடம் கேள்வி எழுப்பினார். “முறையான அனுமதியின்றி மியான்மர் சென்று ஆயுதப் பயிற்சி அளித்த அமெரிக்க கூலிப்படையைச் சேர்ந்த வான் டைக் மட்டும் சொந்த நாட்டுக்குச் செல்ல அனுமதிப்பது எப்படி?” என்று அவர் கேட்டார். அதேவேளையில், அமெரிக்காவில் இருந்து இந்தியர்கள் கைவிலங்குடன் நாடு கடத்தப்படுவதையும் அவர் சுட்டிக்காட்டினார்.வெளிநாட்டினர் சட்டப் பிரிவுகளின் கீழ் குற்றப்பத்திரிகை தாக்கல் செய்யப்பட்டிருந்தாலும், தீவிர விசாரணை தொடர்ந்து நடைபெற்று வருவதாக என்.ஐ.ஏ. தெரிவித்துள்ளது. அமெரிக்கத் தூதரக அழுத்தத்தாலேயே இந்தத் தளர்வுகள் வழங்கப்பட்டதாக எதிர்க்கட்சிகள் குற்றம்சாட்டி வருகின்றன.
