காங்கோ : செப். 15–-
காங்கோ ஜனநாயகக் குடியரசின் கிழக்குப் பகுதியிலுள்ள புகாவ் நகரில் உள்ள உஜமா தொடக்கப் பள்ளியில் ஏற்பட்ட தீ விபத்தில் 26 குழந்தைகள் பரிதாபமாக உயிரிழந்தனர். 30க்கும் மேற்பட்டோர் காயமடைந்தனர்.
வியாழக்கிழமை காலை சுமார் 9 மணியளவில், மாணவர்கள் வகுப்பில் இருந்தபோது, பள்ளியின் அருகே காரணம் தெரியாத வகையில் தீ விபத்து ஏற்பட்டது. பீதியடைந்த குழந்தைகள் தப்பிக்க முயன்றபோது ஏற்பட்ட நெரிசலில் சிக்கினர். அதில் மூச்சுத்திணறல் காரணமாகப் பல பள்ளி மாணவர்கள் உயிரிழந்தனர்.பிப்ரவரி 2025 முதல் புகாவ் நகரைத் தங்கள் கட்டுப்பாட்டில் வைத்துள்ள ஆயுதக் குழு வெளியிட்ட தகவலின்படி, உயிரிழந்தவர்களில் 20 சிறுமிகளும் 6 சிறுவர்களும் அடங்குவர். குறைந்தது 25 குழந்தைகள் காயமடைந்துள்ளதாக யுனிசெஃப்) அமைப்பு தெரிவித்துள்ளது.
உஜமா தொடக்கப் பள்ளியின் ஆசிரியர் சைமன் கசமிரா கூறுகையில், “பாடம் நடத்திக்கொண்டிருந்தபோது, திடீரென மாணவர்கள் அலறும் சத்தம் கேட்டது. சிலர் மேல் தளங்களிலிருந்து கீழே குதித்தனர். மற்றவர்கள் கதவுகள் வழியாக வெளியேற முயன்றனர்” என்றார்.தெற்கு கிவு மாகாணத்தின் தலைநகரான புகாவ், பிப்ரவரி 2025-ல் ஆயுதக் குழுவின் கட்டுப்பாட்டிற்குள் வந்தது. கிகாலியின் ஆதரவுடன் செயல்படும் குழு, 2021-ல் மீண்டும் வலுப்பெற்றதிலிருந்து கிழக்கு காங்கோவில் பரந்த நிலப்பரப்புகளைக் கைப்பற்றி, அங்கு மாற்று நிர்வாகத்தை நிறுவியுள்ளது. கிவு ஏரியின் கரையில் அமைந்துள்ள புகாவ் நகரம், மலைச்சரிவில் நெருக்கமாக அமைந்திருக்கும் தனித்துவமான மர வீடுகளுக்குப் பெயர் பெற்றது. இந்நகரம் அடிக்கடி கொடிய தீ விபத்துகளுக்கு ஆளாகிறது. மிகச் சமீபத்தில் ஏற்பட்ட தீ, மலைச்சரிவில் அடர்த்தியாகக் கட்டப்பட்டிருந்த ஒரு பெரிய பகுதியை முழுமையாக அழித்து, வீடுகளின் இடிபாடுகளை மட்டுமே எஞ்சியிருக்கச் செய்தது. M23 குழு மூன்று நாள் தேசிய துக்க காலத்தை அறிவித்துள்ளது. மேலும், தீ விபத்து குறித்து விசாரணை நடத்தப்படும் என்றும் தெரிவித்துள்ளது.
