சென்னை, அக். 27-
தனியார் பள்ளிகளுக்கு அனுமதி வழங்க ரூ.100 கோடி லஞ்சம் பெறப்பட்டதாக எழுந்த புகார் தொடர்பாக, தி.மு.க. முன்னாள் அமைச்சர் மகேஷ் கைது செய்யப்பட்டு, விசாரணைக்குப் பின்னர் நள்ளிரவில் புழல் சிறையில் அடைக்கப்பட்டார். இந்த நடவடிக்கையை வீ தி லீடர்ஸ் அமைப்பின் நிறுவனர் அண்ணாமலை வரவேற்றுள்ளார். இதுதொடர்பாக அவர் வெளியிட்ட அறிக்கையில் கூறியிருப்பதாவது: பள்ளிக் கல்வித் துறை தொடர்பான முறைகேடு குற்றச்சாட்டின் அடிப்படையில், முன்னாள் அமைச்சர் மகேஷ் கைது செய்யப்பட்டிருப்பதை வரவேற்கிறோம். தவறு செய்தவர்கள் யாராக இருந்தாலும், அவர்கள் மீது சட்டப்படி உரிய நடவடிக்கை எடுக்கப்பட வேண்டும் என்பதில் மாற்றுக் கருத்துக்கு இடமில்லை. கடந்த 2023-ம் ஆண்டு, நாங்கள் ‘தி.மு.க. பைல்ஸ்’ வெளியிட்டபோது, தமிழகத்தில் நோபல் ஸ்டீல் நிறுவனம் மேற்கொள்ள உள்ளதாகக் கூறப்பட்ட ரூ.1,000 கோடி முதலீடு தொடர்பாக எழுப்பிய கேள்விகளுக்கு அன்றைய தி.மு.க. அரசு உரிய விளக்கம் அளிக்கவில்லை. அந்த முதலீடு தமிழகத்துக்கு வரவில்லை. அது முறைகேடான முதலீடு என்ற எங்களது குற்றச்சாட்டுக்கும் இன்றுவரை பதில் அளிக்கப்படவில்லை. மேலும், மகேஷ் தொடர்பானதாகக் கூறப்படும் உதயநிதி பெயரிலான அறக்கட்டளை, நோபல் பிரிக்ஸ் நிறுவனம் செயல்பட்டு வந்த அதே முகவரியில் இயங்கி வந்ததாக வெளியான தகவலுக்கும் இதுவரை விளக்கம் இல்லை. நோபல் பிரிக்ஸ் நிறுவனத்துக்கும் உதயநிதி அறக்கட்டளைக்கும் இடையே என்ன தொடர்பு? அந்த நிறுவனத்தின் ரூ.1,000 கோடி முதலீடு தொடர்பாக எழுப்பப்பட்ட கேள்விகளுக்கு என்ன பதில்? இந்த விவகாரத்தில் தவெக அரசு வெளிப்படையான விசாரணை நடத்தி, உண்மைகளை மக்களுக்குத் தெரிவிக்க வேண்டும் என்று அண்ணாமலை தெரிவித்துள்ளார்.
